ZPM kaihhruai Mizoram sorkarin Forest Conservation Amendment Act, 2023 (FCAA) a pawm duh lohna leh sut leh tura nawr nan eptu party, MNF-in Mizoram pum (Dampa bial huam chhung tel lo) huapa total bandh Nilainia an huaihawt chu chhun dar 1 atangin tihtawp a ni.
Ruahman lawk dan chuan total bandh hi zing dar 6 atanga tlai dar 4 thleng neih tur ni mah se, mipui thlawpna tha tak an hmu nia an hriat avangin tlai dar 4 hmain an titawp a ni.
MNF Treasurer Lalruatkima chuan MNF Hnam Run-ah total bandh tihtawp chungchang hi thu thar thehdarhtute hmaah a puang a, chuan thlawp a hlawh that avangin lawmawm a tih thu a sawi.
Lalruatkima chuan Mizoram sorkar, mipui, political party, sorkar hnathawkte leh zirlaiten an thlawp that avangin lawmthu a sawi a. Total bandh an huaihawt avanga eizawnna a tihbuai te, zin veivak, dam lohna te, zirna in hrang hrang a tihbuainaahte thupha a chawi tih sawiin, “Indan buai ngai kan tawng lote hi a lawmawm tak zet a ni,” a ti.
MNF treasurer chuan Mizoram hi Mizote ta a nih zel theih nana India leh Mizoramin inremna an ziakah India danpui Article 371G hnuaiah land ownership leh transfer of land bilh tel a ni a. He danpui hnuaiah hian India prime minister an ni emaw, Ambani te pawh nise ram an nei thei lote hi hnam martarte thisena sual chhuah ropui tak a ni a, thangtharten a hlutzia an la hmu dawn chauh tih a sawi.
FCAA adopt avangin tunah hian land ownership leh transfer of land a tihdanglam tak avangin Mizoram ramngaw leh nungcha te, Mizoten an hlut em emte hi chân mai a hlauhawm tih sawiin Lalruatkima chuan, “India ramah land transfer leh ownership hi Mizoram leh Nagaland chiahin kan nei a, humhalh bik kan ni a. Hei hi humhalh a nih zel theih nan MNF chuan hma a la zel dawn,” a ti bawk.
FCAA adopt a ni ta mai chu pawi a tih thu sawiin MNF treasurer chuan, “Nagaland chuan a adopt duh lo va, en that leh theih tura an tih laiin Mizoram sorkar erawh chuan a ziak zawng zawngah an pawm a. Hei hi ngaihtuah tha leh turin kan thlen tawh a. Kan bawhzui zel dawn a. Theihtawp kan chhuah zel dawn a, kan sorkar hunah kan ennawn leh dawn a ni,” tiin Mizoram sorkar ZPM-in dan tha lo leh hlauhawm tak, FCAA hi Council of Ministers-in a lo pawm leh Mizoram Legislative Assembly-a a lo pawm ve duh lohna leh sut tura an phutna total bandh MNF-in an huaihawt chu an tawpna a nih loh thu a sawi bawk.
Zawm a hlawh, buai awm lo
MNF Party-in FCAA, 2023 duh lohna leh sut tura nawr nana Nilaini zing dar 6 atanga chhun dar 1 thleng Mizoram chhunga total bandh an huaihawt chhungin mipuiin an zawm tha a, Aizawl Police station-ah thubuai ziah luh pakhatmah a awm lo.
Total bandh huaihawt a nih chhungin hmun lun lai leh kawipui hrang hrangah MNF party worker-te leh venhimna thawktute duty-in magistrate lam ten hmun hrang hrang an tlawh kual reng bawk a, total bandh tihtawp a nih thlengin buaina leh harsatna thleng hriat tur a awm lo.
Total bandh hi mipuiin an zawm tha hle a, sumdawnna hmun, zirna in leh dawr inhawng a awm loh bakah phalna nei tih loh mihring leh lirthei veivak hmuh tur an awm lo.
The Zozam Times zawhna chhangin Aizawl Police Station OC Lalnunmawia chuan dan bawhchhiaa man pakhatmah an awm loh thu leh thubuai ziah luh emaw, FIR theh luh emaw a awm lo va. Dan leh thupek kenkawh kawngah buaina leh harsatna a awm lo va, tum dang ai pawhin pawn chhuak an tlem a. Pawn chhuak chhunte pawh dam lohna tak tak, damdawi in pan ngei ngei ngai ang chite chauh an nih thu an sawi.