Mikel Arteta chuan set-piece atanga goal thun theih hi kum 10 kal ta atanga a lo suangtuah tawh a nih thu a sawi chhuak.
Season hmasa tan tirh atang tawh khan Arsenal chuan set-piece atangin goal an thun hnem tawh hle a, tun thlengin goal 23 zet an thun tawh a. Set-piece atanga hetiang zat goal thun thei hi Europe khawmualpuiah team dang an awm lo a ni.
Corner an hmang tangkai hle a, corner an hlawh chhuah atangin goal 37 zet an thun tawh a, Premier League team dangte aiin corner atang hian goal 16 laiin an thun hnem tawh zawk.
Arteta chuan, “Kum 10 kal ta atang tawh khan set-piece atanga goal thun theih hi ka lo suangtuah tawh a. Heti lai hmunah hian kum 10 chu ka la awm lo a, ka ngaihtuah tanna chu a rei tawh a ni. Ka rilruin chutianga set-piece hmanga goal thun thei deuh nih theih chu a tha dawn riau hian ka hria a, chu ka duhthusam chu a taka chantir theih dan ka ruahman nasa thin a. Ka ruahmanna thlen diktir thei tur mihring ka ngaihtuah tel nghal bawk a ni,” a ti.
2015-16 season kha Arsenal-a Arteta khelh hnuhnun ber niin coaching badge nei thei turin hma a la tan a. Arsenal chhuahsanin Manchester City-ah coaching a luhchilh a, hetah hian Nicolas Jover nen an intawng.
Jover hi a hnuah Brentford chuan set-piece coach atan an chhawr a, Arsenal-in Arteta chu manager atan an chhawr a, kum hnih pawh an la chhawr tlin hma, kum 2021 khan set-piece coach turin an la lut ve leh a ni.
“Manchester City-ah khawvela manager tha ber kaihhruaina hnuaiah ka awm a, hetah hian thil tam tak ka zir chhuak a. Engtin nge hma kan sawn belh theih ang tih te, hma sawn belh tur chuan eng te nge tih ngai tih chu ka rilru luah tamtu a ni a. Amaherawhchu, chutiang thlen diktir thei tur chuan thiam ber leh tha ber ka ni miau si lo,” tiin Arteta chuan a sawi.
“A tha ber ka nih si loh chuan engtia hma lak chi nge tih ngaihtuahna a lian chho a. Chutianga ngaihtuahna kal vel karah chuan set-piece hman tangkai duhna chu a lian ber pawl a ni chho zel a ni,” a ti bawk.