MPCC President Lal Thanzara’n Dampa bial by-election neih turah MNF leh ZPM chuan an candidate tling se an duh lo niin a sawi.
MPCC president hian Ningani khan Dampaa Marpara, Pukzing Vengthar, Lenbuang, Hnahva leh Silsury tlawhin an party zawm tharte a lawm lut a. MNF leh ZPM party hian an candidate tling se an duh lo, campaign pawhin an chhuak peih lo va, an kal chhunah pawh an candidate-te miin an nuihzat theihna turin pawi an sawisak niin a sawi.
Lal Thanzara chuan Congress ni lo an sorkar apiangin Mizoramin manganna, buaina leh harsatna an tawk thin niin a sawi a. By-election an hmachhawn turah an party candidate John Rotluangliana a tling a nih chuan chiang takin kum 2028 MLA inthlanpuiah an sorkar leh dawn tih nemnghehna a nih tur thu sawiin, thuneihna an chang leh a nih chuan NLUP changtlung zawk hmangin chhungkaw tin huapzo policy an kalpui leh tur thu a sawi.
Dampa bial by-election atana INC Candidate John Rotluangliana pawhin thu sawiin, “Tun by-election-ah Congress party chu zero atangin hero-ah Pathianin min hruai kai ta. Kum 40 zet politics huangah ka awm tawh. Ka hnena lo kal vang vanga membership fee min pe hi ka la hre lo. Mahse, tunah chuan opposition ni chungin min rawn pan ta. Congress hi Mizoramin a mamawhzia a nemnghet a ni,” a ti.
Khawiah pawh Congress sorkar nghakhlelin an ko va, kum 2028 an nghak thei tawh lo tih sawiin Dampa bial atangin Congress sorkar thar hmel an lantir dawn a, ZPM sorkar thiltih dan duh lohna hi mipuiin vote hmangin an protest dawn a, ram hruaina hi tawngkam thiamah a ni lo, ni chu ni, ni lo chu ni lo, a ni tur a ni tih sawiin, “Kum 2028-ah NLUP changtlung zawk kan kalpui dawn avangin Mizoram a hlim ang a, mipui thla a muang leh ang,” a ti.
He hunah hian MPCC Vice President C. Ngunlianchunga, MLA leh MPCC Adviser Zodintluanga Ralte, ex-Minister te pawhin thu an sawi.