MNF Sr Vice President Dr R Lalthangliana chuan Chief Minister Special Pakage leh Hand Holding policy te chu innghahna tlak a nih lo tih a sawi.
Dampa bial by-election atana MNF candidate ni bawk, Dr R Lalthangliana’n Nilaini khan khaw hrang hrang a tlawh hnuah Ningani khan Hruiduk, Pukzing Vengthar, Hnahva leh Silsuri a tlawhin heng khuaa MNF party hruaitute nen an inkawm.
An inkawmnaah Dr R Lalthangliana chuan ZPM-in Dampa bial by-election a an auhla leh mipui an vehthlemna ber, Chief Minister Special Package cheng nuai khat pek tih leh hand holding policy chu mipui tan innghahna tlak a nih loh thu sawiin, “Kum hnih dawn ZPM sorkarah hian Dampa bial Silsuri-ah pakhat chauh la pek a ni. Hemi atan hian sum pek tur sorkarin an nei lo a, innghahna tlak a ni lo,” a ti.
MNF candidate chuan hand holding scheme-a loan an aupui pawh mi rethei zawkte dawmkanna tur ni lovin rulh leh ngei ngei ngai, pawisa pung tam tak nena leiba insiamna a ni thei tih a sawi a. Sorkar lai mekin kuthnathawktute a enkawl dan leh an hlawhchham chhoh mek dan an hmu tawh a. Dampa biala hmunphiah chingtute tah leh rumna an hria a, sawhthing chingtute sum tur Rs vbc 5 vel tihchingpen thu te an hre zui leh a, an la bat sak teuh bawk a. Chuvangin, ZPM sorkarah kuthnathawktute tan beisei tur thar a awm lo tih a sawi.