Aizawl Zoological Park (sahuan) atangin dan lova exotic bird (Pesquet’s Parrot) tawlh ruk man chu rukbo a ni a. Hemi chungchangah Sairang Police Station-ah First Information Report (FIR) theh lut niin rukbotute man chhuah theihna khawp information pe thei tan danin a phal angin Rs. 20,000 pek an tiam.
Thuchhuah an siamah Aizawl Wildlife Division chuan dan lova exotic bird (Pesquet’s Parrot) tawlh ruk man, Aizawl Zoological Park (sahuan)-a February, 2024-a dah luh chu Nilaini zing dar 8:35-ah rukbo a ni tih hriain rukbo hun hi Thawhlehni tlai lam dar 4 atanga Nilaini zing dar 7 inkar nia an hriat thu an sawi a. He thil thleng chungchangah hian Sairang Police Station-ah FIR thehluh niin information tangkai thei tur nia hriat dangte khawn khawmin an theh luh belh mek zel tih an sawi.
Wildlife Crime Control Bureau (WCCB), Kolkatta hnenah pawh hriattir nghal niin theihtawp chhuahin hma an la nghal a. He thil thleng chungchangah hian thawktute inhnamhnawihna awm thei a nih avangin a theih dan danin department chhungah an inchhui zui mek bawk a. Hetiang thil sahuana a thlen tawpna a nih ngei theih nan theihtawp an chhuah mek zel a. He thil thleng avang hian sahuana thawktute chu duty hun insiamin a inchhawka tlaivarin an duty nghal a ni.
He thubuai hi an bawhzui zel a, a chhui zuina atana tangkai thei tur information pe thei an awm a niha thil sual titute man chhuah theihna khawp information a nih phei chuan ‘The Mizoram Rewards for Detection of Forest and Wildlife Offence Scheme 2019’-in a phal angin lawmman Rs. 20,000 pek an tiam a. Information petu chu an nihna (identity) thupsak tlat an ni dawn tih Aizawl Wildlife Division thuchhuah chuan a tar lang.
- Information pek theihnate:
Office Address : Office of the Deputy Conservator of Forests
Aizawl Wildlife Division (MINECO)
(Near State Information Commission Office/Passport Office)
Aizawl, Mizoram
Mobile No. : 8974436843 / 8414012905 / 9862347339 / 8014343542 (with Whatsapp)