November 7-9, 2025 chhunga Gurugram, Haryana-a ‘18th Urban Mobility India (UMI) 2025’ neihah Mizoram sorkar chu Mizoram Traffic Management System chungchangah Special Award hlan a ni.
Union Minister Manohar Lal leh Union Minister of State Tokhan Sahu, Ministry of Housing & Urban Affairs ten ‘Special Award’ an hlan a. Mizoram sorkar aiawhin UD&PA Secretary Lalmalsawma Pachuau, UD&PA Director Jacob Lalawmpuia leh Town & Country Planning Officer ten an dawng a ni.
Urban Mobility India Conference hi Ministry of Housing & Urban Affairs hnuaiah Institute of Urban Transport (India)-in kum tin huaihawt thin a ni.
Award dawng tur hian Award Selection Committee-in presentation nei tura a hriattir angin, Town & Country Planning Wing, UD&PA Deptt chuan October 16, 2025 khan video presentation bakah powerpoint presentation an pe a. Mizoramah traffic rules tha taka zawm a nih dante, mipuiin dawh thei taka traffic buai nuai nuai lova an tlan thin dante, tul loah horn hmeh rik a nih ngai loh dante, Coordination Committee on Traffic Management te hmalakna te presentation-ah tarlan niin, Aizawl chu Silent City tia sawi thin a nih thu te tarlan a ni bawk.
He an presentation pek zulzui hian Award Selection Committee chuan Central Ministry ah recommendation pein, Mizoram sorkar aiawhin UD&PA Department a hotuten an dawng a ni.