Aizawl: MNF Treasurer Lalruatkima chuan Central Young Lai Association (CYLA) duh loh dana FCAA pass luitu ZPM chu hnawl ngam turin a ngen.
Inrinni zingkara Lawngtlai Areopagi-ah LADC inthlan campaign neia thu a sawiah Lalruatkima chuan, CYLA duh lo dana FCAA pass luitu ZPM hi hnawl ngam turin Laifate a ngen tih sawiin, “Tun hun hi FCAA in duh lohna lantir hun a ni. FCAA hmanga Zofate leh Laifate kan inhung bikna min tihchhiatsak vektute hi i hnawl ang u. Zoram hralhtu ZPM hi lo hnawlin, sorkar nghet siamtu tur MNF lo vote ve turin mipuite ka ngen a ni,” a ti.
ZPM sorkar enchhin chu bubble gum thial ang mai, an thlum rei lo hle tih sawiin Ruatkima chuan, “Zoram hruai dan hlawl hi an hre lo a ni. Ni 100 inhlawhnaah MNF sorkar laiin hlawh lak theih loh a awm ngai lo. Tunah chuan hun rei tak tak ni 100 inhlawhna hlawh an la thei lo a, a pawi hle a ni,” a ti a. Pathian leh mipui zarah 2028-ah MNF an sorkar leh dawn a, LADC inthlanah pawh hian mipui sukthlek enin an sorkar leh ngei dawn nia a lan thu a sawi bawk.
MNF treasurer chuan, “Kan CM thusawi zawng zawngte chu irhfiak damdawi an ti zo tawh a. ZPM sorkara thil danglam kan hmuh chu CM hmel chiah a ni. Developent-ah an hlawhchhama, an thutiamah an hlawhchham a, ti lo tura an intiamah an hlawhchham bawk. Kawng engkima fail sorkar kan hrawn mek a, a vanduaithlak tak zet a ni,” a ti bawk.
Lalruatkima chuan, “Sorkar kal tawh Pu Lal Thanhawla hruai leh Pu Zoramthanga hruaite khan minority atangin India flag motor-a tar thei aiawh an dah thin a. Tun sorkarah erawh chuan chutiang chu a ni ta lo. Lai ram mai ni lo, minority atanga ZPM MLA tling chhun Dr Lorrain Lalpekliana Chinzah hi inthlan hma ngei hian Minister dawhkanah thuttir rawh se. Heti taka Lairam ngaihsak lo leh duhsak lo tute hi Laifate hian i hnawl ngam ang u,” a ti bawk.