- Laiu Fachhai
Kristian ni lo lal leh ramten mi ram awp leh luah tuma mihring maktaduai tam tak an thahin, “ringlo mite an ni a,” tia ngaihhnathiamna tur chen a awm pawhin, Kristian inti, Khawthlang lam lal leh ramten ringlo mite tih dan anga an ti ve mai erawh kha chu, Kristian thinlung leh mit atanga thlir chuan ngaihtuah ngam leh en ngam pawh a ni lo. North leh South America continent-a a ram neitu (indigenous) hnamte chu European Christian colonial power-ten an tichimit vek tep a ni. Australia leh New Zealand rama awm hmasa (indigenous) hnamte ram pawh British Kristian hovin an neih vek deuh thaw a ni. Colonial power zingah khan hnam finga inchhal British Empire kha mihring that nasa ber nia hriat a ni a. Indiaah ringawt pawh kum sawm li (1880-1920) chhungin British colonial policy avangin maktaduia 100 aia tlem loh mihring an thi a ni awm e.
Mahni mihringpuite, hmun thenkhatah phei chuan Krista ringtupuite, sala man, sala hralh, sala lei leh sala nei hnamzia leh nunzia (slavey system) kha kum 2000 chhung Kristiante thiltihsual a ni a. Kristian Portugal colony chuan Ghana ram Atlantic tuipui kamah Elmina Kulh (Castle) an sa a, kulh lailiah chapel a ding a, chapel-ah chuan zingah an inkhawm a, tlai lamah chuan an sal mante hralh turin lawng chhungah khaidiata an kete thlungin North America leh Europe lamah an phur thin. An puar khawp lo chaw an pe a, damlo leh thite an awm thin a, thite leh damlo zualte chu tuifinriatah an paih thin nia sawi a ni. Kristiante thiltih atan chuan a rapthlak hle.
Khawvel indopui vawi khatna leh vawi hnihnaa indote kha, Japan tih lohah chuan, Kristian ram an ni hlawm a, Kristian leh Kristian an inthat tihna a ni chu. Tunlaiah hian kan thenawm Chin State-ah pawh Kristian leh Kristiante an indo a, an inthat mek bawk. Kum zabi 16-na atanga kohhran siamthatna (reformation) a lo awm hnua Catholic leh Protestant Kristiante indona avanga lehlam lehlama Kristian thite kha hmasang kohhran hun laia ringlo miten Kristiante an tihduhdahnaa Kristian thite aiin an tam zawk a ni. Indopui vawi hnihnaah khan Kristian Germany chuan râwng takin Juda civil mi maktaduai ruk a that a, khatiang thil kha chu “awm tawh loh hram se” (never again) tih tawnghmang a lo chhuak phah hial a ni.
Kum 1960s thlengin USA, a bik takin Bible bial an tih chhim lamah chuan, mi ngo Kristianten mi hangte thliar hranna leh dah hranna (segregation) dan an la kalpui rih a ni. A hranpain sikul te kalin biak in te an neih a, bus chhungah takngial pawh thut dun phal a ni lo. Mizoramin state kan hmuh hnu, kum 1990s thleng khan South Africaah chuan mi ngo leh mi hang thliar hranna leh dah hranna Apartheid system an la kalpui a ni. Mi ngo (White settler) Kristiante chuan a ram neitu mi hangte chu nekchepin, an pianpui chanvote chhuhsakin an ramte an neihsak vek deuh thaw a. A ram mihring 100-a 80 chu mi hangte an ni a, mahse chutiang khawpa tam majority te chuan ram hruaitu an nih theih lo a, voting right takngial pawh an neih lo. Kristiante an tam zawkna Rwanda ramah pawh kum 1994-ah khan genocide a la awm. A chunga kan sawi tak ram leh hnamte khian Kristian chu an inti vek a, mahse ringlo mite ai pawha chhe zawkin an zual zawk a nih kha maw!
Tunlaia Middle East dinhmun hi en ila. Gaza-a indona reporttu international chanchinbu awm chhun Aljazeera fact findingah chuan, “Two years of Israel’s genocide in Gaza: By the numbers” tih thupui hmangin October 7, 2025-ah tiang hian a report a ni: Israelin Gaza a runna kum hnih chhungin, mihring nuai 22 vel chauh awmna Gaza ramah chuan damdawi in leh clinic 125, university 63 telin zirna in 2,300, mosque 1,000 aia tam, biak in 3 leh building 100-a 92 (92%) tihchhiat a ni a; naupang 20,000 aia tam, health leh medical worker 1,722, journalist 300, aid worker 200 leh blockage avanga mihring tam tuara thi 459 (naupang 154) te telin mihring 67,000 thah an ni a (he article ziah laiah chuan 70,000 aia tam thi tawh anga report a ni); mihring 169,000 in hliam an tuar a; building chimna hnuaia awm ruang hmuh loh sang telin an awm bawk a; Israel jaila tang mek Palestinian mi, court-a an chanchin thlen loh 10,800 an awm a, chungho zingah chuan naupang 450 leh hmeichhia 87 an tel a ni. Gaza rama mihring awm zawng zawng deuh thaw chu anmahni ram ngeiah refugee-in an vak kual mek bawk. Hei hi “Pathian hnam thlan” inti Israel ho thiltih dan a ni. “Pathian hnam thlan” thiltih atan chuan an inhmeh loh hle.
Hetiang em ema “Pathian hnam thlan” intiten Gaza civil mi, hmeichhia leh naupangte chunga an nunrawnna leh an thiltih tha lote hi Kristian inti tam takin an pawmpui lehnghal a, a lungchhiatthlak hle. Israel sawrkar leh a sipaiten Gaza mipuite chunga an thiltih hi khawvel ram hruaitu tam takin an dem a, khawvel ram leh mipui zawng zawng deuh thawin an dem bawk a, Juda mite ngei, Juda sakhaw puithiam thenkhat te, Journalist ropui, Tel Aviv chanchinbu hlun leh lian Haaretz columnist Gideon Levy leh journalist dang te, American Jewish Professor Jefferey Sachs, Professor Norman Finkelstein leh khawvel mithiam tam takten genocide, ethnic cleansing leh war crime a ni e tia an sawi mek laiin, USA politician tam takte leh evangelical Kristian inti thenkhatte chuan an dem duh miah lo. Sum hmaizah vang leh Pathian thu hrilhfiah sual vang a nih a rinawm. Mizoramah pawh hian Pathian thu hrilhfiah sual avangin Israel thiltih zawng zawng tan tlattu an awm ve nual awm e.
American politiciante chuan Israel tana lobby pawl, American Israel Public Affairs Committee (AIPAC) leh a thurualpui pawlte atanga campaign sum tam tak an dawng thin a. USA Federal Election Commission (FEC) report (Jan 24, 2025) atanga a lan danah chuan kum 2023-2024 election cycle-ah khan AIPAC leh a thurualpui pawl AIPAC PAC leh Super PAC (United Democracy Project) te chuan, Israelin Gaza-a a raldona atan US tanpuina (military aid) pawmpuitu US Senate leh Representative candidate 361 (Republican 233, Democrat 152 leh Independent candidate) rualte hnenah donation USD 126.9 million lai an pe a ni. Chuvangin Israel sawrkar leh sipaite thiltih chu an dem duh miah lo niin a lang. Sum hmaizah chu a lo na teh e. An chhia leh tha hriatna pawh an hmang thei tawh lo a nih hi maw!
USA rama Scofield-a zirtirna kalpuitu Christian Zionist inti politician leh evangelical Kristian thenkhatte lah chuan Genesis 12.1-3 thute hrilhfiah sual leh tanchhan sualin “Israel malsawmtu chu Pathianin mal a sawm ang,” an ti a. Thuthlung Hlui hun laia Israel ram zawng zawng kha Judate ram a nih leh vek hunah Lal Isua a lo kal leh ang, tiin Israel ram tizauna politics chu an thlawp ta a. Chutichuan Israel sawrkar thiltih apiang chu pawmpuia malsawm zel an tum ta a ni. Tunlaia Gaza ram leh mipuite chunga Israel thiltih hi kum zabi 21-naa thil thleng tur atan chuan thil rapthlak lutuk leh thil mak tling a ni. America politiciante pawh an chhiat leh tha hriatnain a pawmpui theih a rinawm loh. Mahse AIPAC sum hmaizahna avangin Israel sawrkar leh sipaite thiltih chu pawmpui talh an tum ni berin a lang. An dinna chu Pathian thu hrilfiahna dik loh hmanga tihnghet an tum lehnghal a, a hahthlak hle. Mahse a mak hranpa lo ve. A chunga kan sawi tak ang khian, 1960s thleng thlenga segregation policy leh theology kalpuitute kha an ni tlat si a.
Abrahama thlah dik chu Abraham rinna chhunzawmtu Lal Isua Krista a nihzia Tirhkoh Paula chuan chiang takin a sawi: “Tin, Abrahama hnênah a ni thu chu tiamin a awm ni, a chi thlah hnênah pawh. Mi tam tak chung thu sawi angin, ‘Chi thlahte hnênah pawh,’ a ti lo va, mi pakhat chung thu sawi angin, ‘I chi thlah hnênah pawh,’ a ti a ni zâwk e, chu chu Krista hi a ni.” (Galatia 3.16). “Krista ta in nih chuan, Abrahama thlah, thutiam anga roluahtu tûrte in ni.” (Galatia 3.16,29). Abrahama thlah dik chu Lal Isua a nihzia Stephana pawhin a sawi a, chuvangin Judaten an vawhlum nghe nghe a nih kha (Tirhkohte bung 7). Lal Isua amah ngei pawhin Judate hnenah, “‘Abrahama kan thlahtu a ni alâwm,’ tiin inngaihtuah suh u; Pathianin hêng lungte hi Abrahama thlahahte a dintîr thei e, ka tih che u hi,” tiin Abrahama thlah nih chu, thisena inthlah ni lovin, rinna thutiama inthlah a nih zawkzia chiang takin a sawi a ni (Mathaia 3.9).
Thenkhatin Rom bung 9 leh bung 10 leh Bible hmun danga Israel chanchinte tanchhanin Israel ni tawh phawt chu vanram kaitir an tum talh a. He Bible bung leh changte hian Israel fate chu Israel an nih vang hrim hrima vanram kalna ticket a pe lo. Heng bung leh changte hian chhandamna chu Lal Isua rinnaah chauh a awmzia a nemnghet a, Jentailte rualin Israelte tan pawh an hnawl tawh Lal Isua an Mesia an rin theih hun a awm tur thu lam a kawk zawk. Lal Isua ngeiin, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo,” tiin chiang takin a lo sawi tawh a ni (Johana 14.6).
Chuvangin Mizoram Kristiante chuan Khawthlang lam Kristiante thiltih sual angte kha tisual ve lo turin firmkhur ila, Khawthlang lam Kristian thenkhat Pathian thu hrilhfiah sual leh rinna kal sual ang hian i kal sual ve lo ang u. Tunlaia Gaza leh Israel buainaah pawh hian, October 7, 2023-a Hamas ho thiltih kha Lal Isua lawm zawng a nih a rinawm loh ang bawkin, Israel sawrkarin kum 75 chhung Gaza leh Palestinian mite chunga a thiltih, a bik takin tunlaia Gazaa a thiltihte hi Lal Isua lawm zawng a nih a rinawm theih lohzia tlangaupuiin remna leh muanna a awm theihna atan i tawngtai zawk ang u. Lal Isua Lalramah chuan Juda mite duhsak bik an nih loh tur hre chiang tawh ila, Juda mi pawh, Palestine mi pawh, keini pawh, eng hnam leh ram pawh, kan inang vek a, amah Lal Isua kaltlanga Pathian nena inrem vek tur kan ni tih hi i hre chiang tawh ang u (2 Cor 5.16-21; Gal 3.28).
Kan awmna India ramah hian Nagaland leh Mizoram chu Kristian tamna ber state pahnih kan ni a, Nagalandah Kristian 100-a 88 vel awmin Mizoramah Kristian 100-a 87 vel kan awm a ni. Chuvangin Mizoram Kristiante chu Krista hriatna, tihna, a duh dan anga nunnaah leh hnamdangte chunga rilru put dan tur thlengin, tlang chhipa khaw awm, thup theih loh, ram dang leh hnamdang mite tan entawn tlak nih tum zel ila, dikna, rinmawmna, thawhrimna, mawhphurhna hlenna, chhiah pekna leh thil dangah te India statete zinga tihtha ber nih tumin state dangte atan entawn tlak nih i tum zel ang u.