Aizawl: Ministry of Home Affairs atanga mi huaisen chawimawina, ‘Jeeven Raksha Padak Award 2025’ dawngtu, Laltlanzova, Tlangsam, Champhai district hnenah Home Minister K. Sapdanga’n Thawhlehni khan lawmman leh chawimawina a hlan.
Jeeven Raksha Padak Award hi chhiatna leh chetsualna kara huaisen taka mi nunna chhanchhuaktute hnena hlan thin niin, he chawimawina hi mi huaisen bikte dawn thin a ni a; Laltlanzova hian nikum September 7 khan Khawzawl district, Dulte khaw dai, Dilmawiah tui tla an awm tih a hriat veleh a chhan nan a zuang lut ve nghal a. Dilmawi hi feet 50-a thuk niin, theihtawpa a beih hnuah tui tla hi la chhuakin a nunna a chhanhim a ni.
He a thiltih avang leh mi nunna a chhanchhuah avang hian Jeevan Raksha Padak Award 2025 dawng tura thlan a ni.
A pisaa a hlanna inkhawmah K. Sapdanga chuan Mizoten an ngaihhlut em em chu mi huaisente an ni a ti a; pi leh pute hunlai atang tawha an thupui ber pakhat pawh ‘thian chhan thih ngam’ tih a nih thin thu sawiin, tunlai khawvelah hetianga mi dangte nunna chhan nana mahni nunna thap ngam, mi huaisen an nei leh ram pum huap chawimawina dawng thei an nei chu lawmawm a tih thu leh ropui a tih thu a sawi a. Thangthar lo awm leh zel turte tan pawh entawntlak tak a nih thu sawiin thalaite pawhin entawna thian chhan thih ngam rilru chawi nung thar leh theuh turin a sawm.
Home minister hian Award-in a ken tel chawimawina thu ziak leh Rs nuai 1 chu Laltlanzova hnenah a hlan a ni.