Lionel Messi chuan December thlaah India a tlawh dawn a, hmun hrang hrang a tlawh tur zingah a hmaa sawi tel loh, Hyderabad pawh a tel dawn tih a puang.
‘GOAT Tour of India 2025’ pualin Argentine football superstar Messi hian India a tlawh dawn a. A tirah chuan Kolkata, Mumbai leh New Delhi te chu a tlawh tura tih a ni a, tun hnaiah khan social media-ah Hyderabad tihtel a nih thu hi a puang a ni.
Fifa World Cup champion Argentina captain Messi hian Kolkata a tlawh hmasa ber ang a, chu mi hnuah Hyderabad a tlawh leh ang a. He mi hnuah hian Mumbai a pan ang a, a hnuhnung berah New Delhi a tlawh ang a, hetah hian Prime Minister Narendra Modi-a nen an inkawm dawn a ni.
Messi chuan social media-ah heti hian a tar lang a, “India ram atanga min hmangaihna zawng zawngah lawmthu ka sawi a. GOAT Tour chu tun atanga rei lo teah a thleng tawh mai dawn a. Kolkata, Mumbai leh Delhi bakah khan Hyderabad pawh ka tlawh tur zingah kan ti tel tih ka puang duh a. India, kan inhmu vat dawn nia,” a ti a ni.
A tir lamah chuan Messi-a chauh ni lo hian Argentina chu Kochi-ah friendly match khela zin tura ruahman a ni a, November 17 khan Kerala Sports Minister V. Abdurahiman-a pawhin chuan mipui hriatah a puang hman vek tawh a. Amaherawhchu, hei hi an thulh leh tak avangin ruahmanna thar an siam a, Hyderabad hi an telh thar ve leh ta a ni.
Ruahmanna an siam thar takah chuan Messi hian India kil tin a hrut dawn tihna a ni thei a. Khawchhak lamah Kolkata, chhim lamah Hyderabad, khawthlang lamah Mumbai, hmar lamah New Delhi te a tlawh dawn a ni.
December 13-ah Kolkata a tlawh ang a, he mi tlaiah hian Hyderabad a tlawh nghal ang a. December 14-ah Mumbai a tlawh ang a, December 15-ah New Delhi hi a tlawh dawn a ni.