Sports Minister Lalnghinglova Hmar-in Mizo infiammi 2016 hnenah ‘Incentive Cash Award’ Rs 94,19,925 a sem.
Nilaini khan Woodland Hills, Zonuamah ‘Distribution of Incentive Cash Award to Meritorious Sportspersons’ hun hi hman a ni a. April 1, 2024 leh March 31, 2025 chhunga infiamna hrang hrang 15-a international & national level-a medal (gold, silver & bronze) dawng pha chin infiammi 218 leh leh official 41-te hnenah hlan a ni.
Tun tumah hian infiammite tan award 224 leh team official-te tan award 41, a vaiin award 265 sem a ni a. Amaherawhchu, lawmman pakhat aia tam late an awm avangin lawmman dawngtu hi mi 218 (mipa 150, hmeichhia 68) an ni thung.
Award dawn tamnate chu – football-ah 35, badminton-ah pali, muaythai-ah 30, taekwando-ah 29, boxing leh judo atangin pakhat ve ve in an dawng bawk.
Incentive Cash Award hlanna V. Lalsangliana, Secretary, S&YS Department kaihhruai inkhawmah Sports Minister Lalnghinglova Hmar chuan kum 4/5 kaltaa National Games-a Mizoram chu 27/28-na tih vel a ni tih sawiin, “Vawiin hi lawmna hun kan hman mek lai ni mah se, ‘hard talk’ a ngai, kan dinhmun dik taka kan hriata kan tan zual a ngai. Incentives cash award dawng pha chin kan infiammi thazual fuankhawmte pawh hian a state angin national level-ah kan sang lo hle a ni, tih hi kan pawm ngam a ngai,” a ti.
Sports minister chuan, “Sports kan tui a, infrastructure leh thil dangah sum pawh kan seng nasa ve tawh. Mahse, human resource development lamah tan kan lo la tawk lo nge ni ang, Mizoram hian Olympic medalist pahnih chauh kan la nei thei hrih a ni. India-in kum 2036-ah Olympic thlen a tum a, chutah medal lak ve pawh kan la beisei tha ngam lo va, engtin nge kan tel ve thei hram ang kan la ti lauh lauh chauh a ni,” tiin, an zavaia ngaihtuahna an sen tlana tan an lakho a ngai tak zet tih a sawi.