- Robert Zoliana
Pasal, kawppui leh bialpate’n midang laka an uire emaw min phatsan a, min bum hian an rinawm lohna vangin nupa inkarah leh ngaihzawngte inkarah khawvel a thim nghal mup a, tawrhna na ber zingami in min chenchilh nghal thin.
Mahse, heti anga inbumna rilrunatthlak leh na taka tawrh ngawih ngawih theihna ang chi ah hian i hriatreng tur pawimawh em em chu, a rinawm loh vang maia thungrulh nghal emaw phuba lak nana midang laka rinawm lohsan a, phatsan nghal vut vut te hi a tha reng reng lo, tih i hre ngei dawn nia.
Heti anga tawrhna leh hliam na tak atanga dam lam pan a, rinawm lo a, nangmah bumtuin tawrhna a thlen che hi i tawrh dam deuh nghal mai theih nan heng te hi hriat makmawh a ni.
In enkawl tha la, i chakna ‘focus’ rawh
Pasal leh bialpa rinawm lo neih leh kawl hi meidil note a ni ringawt mai a, kawng hrang hrangin tawrhna an thlen zut zut dawn che a, rilru na takin i awm thin ang. Chuvang chuan, i rilru natna leh hreh-awmna tiziaawm a, thawi dam turin hun i mamawh tih in hria la, hun hi damdawi tha tak a ni tih hre bawk ang che. In enkawl tha a, mahni inhma-ngaihna, induhtawk ve na te bakah mahni inngaihsakna a hmâ zawng aiin neih tam tum ang che. Hei hi mi rinawm lo te laka atanga i talchhuahna tur kawng duhawm ber leh a hnu a inchhirna thleng thei laka himna tha tak a ni.
Phuba lak kher a ngai lo
‘Eng nge maw a nih bik le, a la hre ve khawp ang’ ti a, phuba lak emaw thungrulh ve ngei duhna rilru hi hetih hun lai hian a nasa hle thin a, awm mai mai emaw ngawih chuh tlat pawh thil harsa tak a ni thin. A huat leh ngei em em te nena inkawp daih emaw midang daih kawpsan te pawh i rilruk mai thei. Amah-erawhchu, hei hian i thinrimna a tisei mai mai dawn a, rilruhahna a belhchhah zawk hlauh ang. Chu ai chuan, i chakna leh theihna lamah khan insawrbing tum zawk la, i hring nuna a tel ve na bung kha khup hmak tawh ang che.
Fa te nena inhnial pumpelh hrâm rawh
I pasal khan mi dang a kawpsan che a, a rinawm loh san che a nih chuan nupa inkar boruak tha pangngai thlen leh a, chhungkua huikhawm leh hi a harsa tawh hle. Engpawhnise, naupang la te deuh te an nih phei chuan inbumna, rinawm lohsanna leh inphatsanna ang chi hi an hrethiam pha tak tak dawn lova, a hun leh hmun, a tul dan azira an hriat ve kher a ngaih loh te pawh a tha zawk thei. Hi hi hrereng la, i pasal kha i pasal hlui a ni thuai thei a, mahse i fate pa a nihna erawh a bo dawn chuang lo.
Rinawm lohna hmachhawn ngam rawh
A nih tur ang a ni vek tawh a, a thlen tur ang a thleng vek tawh tho a nih chuan, hun kal tawh te ngaihtuah a, indawmkun reng kha a sawt tawh lovang. Karah fanau an awm tawh a nih phei chuan in pahnih inkara indona, buaina, inbeihna, inepna ah khan hawina lam tur hre lo khawpa mangang leh buai taka i siam loh a ngai ang. An nu leh pa te inkara thil thlengah buktawn kual vel an ni lo, tih an hre tur a ni. Tuboh leh do lung inkara an awm lohna tur boruak tha leh duhawm siam dan i ngaihtuah dawn nia.