Lalhruaitluanga Chawngte lehkhabu parukna ‘Chhuk leh Chho’ tih chu nimin khan The Zozam Times office-ah R. Vanranmawii’n a tlangzarh.
Tlangzarh inkhawm hi Lalthlamuana Ralte, Asst. Professor, PUC chuan kaihruaiin, lehkhabu thlirlawkna tlangpui hi F. Vanlalrochana chuan a nei thung.
Lehkhabu tlangzarhtu Vanrammawii (Mawimawii) chuan lehkhabu ziaktu Lalhruaitluanga Chawngte chu fakin, PUC Literature Club in literature programme an hman dawnah pawh chawpchilh taka an sawm pawha a kal zel thu te sawiin, fakawm a tihzia a sawi a ni.
He lehkhabuah hian mihring nuna harsatna tawk tam takin hnehna an chan dan, ‘AN TUM NGE RUH SARUH’ tih te, Sports lama Mizo mi chhuanawm tak tak chanchin INFIAMMI LEH HRINGNUN tih te, thian tha chungchang leh midangte tana malsawmna thlentute chanchin a ni a. Mizote chanchin a ni ber. Nu leh pa ten fate tan leisak chi a ni a, Thalai leh puitling tan pawh lei ngei tur chi a ni e.