Inrinni chawhnu dar 3 vel khan Serchhip leh Keitum inkarah M/s ABCI Infrastructure Pvt. Ltd. tanker chesualin mi pali chuang zingah pahnih an thi a, mi pakhatin hliam a tuar.
Thudawn danin, he tanker (compartment 5 awmna) hian state pawn lam atangin diesel rawn phurin, Serchhip leh Keitum inkar, Keitum thlen hma km 2 vela hla Midum Kham thlen dawnah lirthei dang nena an inpel zo chu a ke hnung lam lei avangin kawngthlangah a inpaih liamin meter 66 vel a lum a. Lirthei a chhe hneh hle a, diesel a phurh te pawh a put ral vek a ni.
Lirtheiah hian mi pali chuangin, a tlak hma hian Akash Singh (16) s/o Ranjit Singh, Silchar chu zuang thlain, hliam tuar loin a chhuak a. A khalhtu, Sagar Singh (26) s/o Arun Singh, Silchar pawh lirthei hian vawrh chhuakin hliam tuarin Serchhip damdawi inah enkawl a ni.
Lirthei che suala chuang ve midang pahnih, Biswajit Singh (27) s/o Babu Singh, Cachar leh Bijoy Singh (24) s/o Sashi Kumar Singh, Dargarbond, Karimganj te erawh chetsualna hmunah hian an boral ve ve a. Keitum leh Serchhip-a mi tlawmngai ten an ruang hi la chhuakin Keitum Branch YMA ten kuang an siam sak hnuah Inrinni zan khan Serchhip damdawi in thlenpui an ni.
Vanduaina thlenna hmunah hian Serchhip Police-te thleng nghalin, buaipui ngai ang angte an buaipui nghal a. He vanduaina thlenga thi te ruang hi Serchhip damdawi inah nimin khan postmortem a nih hnuah an khaw lamah an ruang hi lak a ni.