Prime Minister Narendra Modi-a chuan tun kar tawp, Inrinni leh Pathianni hian Assam a tlawh dawn a, Chief Minister Himanta Biswa Sarma chuan hmasawnna ruhrel din thar hrang hrangte a hawng dawn tih a sawi.
Facebook Live-ah Sarma chuan prime minister hian Inrinni hian Guwahati-a Lokpriya Gopinath Bordoloi International Airport terminal building thar a hawng dawn a. Rs vaibelchhe 4,000 senga din hi ram tan a hlan dawn niin a sawi.
Modi-a hian thlawhna tumhmun hung chhunga feet 80-a sang Bharat Ratna Lokpriya Gopinath Bordoloi-a lim siam thar a hawng bawk ang.
“Terminal thar hi mi zawng zawngin an fak tura duan chhuah a ni a, a lan dan thar hlak a ni dawn a. Tumhmun kawngah hian kawng chhawng siam thar niin hei hi tumhmun chei mawina a ni nghal a, tumhmun leh Jalukbari inkalpawh a awlsam zualna tur a ni bawk,” tiin chief minister chuan a sawi.
Tumhmuna terminal sak thar a hawn hnuah prime minister hian Guawahati-ah hian BJP state office-ah an party worker-te a kawm zui ang.
Pathianni tukah Guwahati-ah vek hian Brahmapitra-a river terminal sak a tlawh ang a, heta tang hian Charaideo lawnga chhuakin zirlai 25-30 vel hmaah ‘Pariksha Pe Charcha’ programme-ah a tel zui dawn niin Sarma chuan a sawi.
Prime minister hian Boragoan-a Swahid Smarak-a Assam Movement-a martar mi 855-te hriat rengna hmunah zahna a hlan ang a. Hemi ni vek hian Dibrugarh tawhin Namrup-IV Ammonia-Urea project lung a phum ang.
Brownfield ammonia-urea complex hi Brahmaputra Valley Fertilizer Corporation Limited hung chhunga Rs vaibelchhe 10,000 senga din tur a ni.
“Lung a phum zawhah hian Assam-ah industrialisation bung thar tan a ni nghal dawn a. Namrup-IV plant hian kum tin urea metric tonne nuai 12 a siam chhuak thei dawn a, tual chhunga hman tur bakah pawn lama thawn tur pawh a awm thei dawn a ni,” tiin chief minister chuan a sawi.