Aizawl: Chief Minister Lalduhoma chuan zirlaite tan Mizoram State University kalpui thuai a ni dawn a, Mizoram Engineering College, Lungleia mi chu nakkum atanga class tantir an tum thu a sawi.
Serchhip Govt. College-in an Campus-a 4th Winter Cum Cultural Fest an buatsaih hmanpuiin, bialtu MLA Lalduhoma, Chief Minister chuan he thu hi nimin khan a sawi a. Serchhip College chu NAAC Grade A kawl mektu a ni a, Grade sang zawk hmu tura tan lak chhoh zel a tul avangin vantlang tana Fest changtlung tak neih hi a thaa a hriat thu a sawi a. He fest hi amah mai pawha Community Activity a nih tawh bakah Fest atanga sum leh pai hmuhchhuahte chu College-a club hrang hrang ten activity neihna atan an hman leh dawn avangin, kawng hnihin college activity lamah an hlawkpui dawn tih a sawi.
Chief minister chuan tun hnaiah zirlai naupangte zingah hun a hmang zauh zauh a. Taihmak leh tumruh a tulzia a hrilh mawlh mawlh thin tih sawiin, “Kumin May thla khan Mizoram chu fully literate state-ah kan inpuang a, India rama a hmasa ber kan ni. Amaherawh chu India ram huap inelna hrang hrangah hnam dangte kan pha lo hle. A chhan ber chu National Exam-ah kan tribal-puite kan tluk loh vang a ni. Hna hi chu a awm, a ST quota pawh kan hnawh khat zo ngai meuh lo. Kan taihmakna leh tumruhna hian min hruai thleng phak thin lo zawk a ni,” a ti.
Inkhawm hi Serchhip Govt. College Principal C Laldintluanga’n a kaihruai a, Organising Secretary Dr. Zarzosanga sawi danin, Winter Cum Cultural Fest atan hian budget Rs nuai 5.6 lakh an siam chu bialtu MLA, chief minister ni bawkin eng emaw zat a pe a ni.