Manchester United Football Club leiba a pung nasa hle a, tun hnaiah khan a vawi khatna atan an leiba chu $ tluklehdingawn khat a tling a. Glazer chhungkuain kum 2005 atanga an club an neih hnua leiba an neih hnem ber tum a la ni.
An club sum dinhmun an puanzar thar berah Glazer chhungkaw hnuaia an leiba chu £ maktaduai 481 ($ maktaduai 644) a nih thu tar lan a ni a. United hian a hnuah £ maktaduai 268 an bat belh leh a, heti hian an leiba belh khawm chu £ maktaduai 749 niin hei hi dollar zawng chuan tluklehdingawn 1.002 a ni.
Britain huam chhunga hausa ber, INEOS Group hotupa, Sir Jim Ratcliffe-a’n February, 2024 atang khan Manchester United-ah 27.7% chanpual a lei a, a leina zat hi £ tluklehdingawn 1.3 niin an sawi a. He mi hnuah hian Ratcliffe leh INEOS chuan Old Trafford-ah sum senso tihhniam tumin hma an la nasa hle a, hetianga an tih zarah hian an club sum dinhmun a that chhoh theih an beisei a ni.
An leiba a pun thu an puan hnuah hian Chief Executive Omar Berrada chuan an sum dinhmun tharlam ber chuan an club siam that an tumna kawngah nasa takin hma an sawn tih a lan thu a sawi chhuak.
Tun season-ah Manchester United chu Europe khawmualpui huap inelnaah an tel lo a, heti chung hian season tan tirh atanga thla thum chhungin hlawkna £ maktaduai 13 an nei a, season hmasa tan tirh atanga thla thum chhung kha chuan £ maktaduai 6.9 an hloh a, hei vang hian nasa taka hma sawn tiin an sawi thei ve bawk a ni.
Europe khawmualpuia an inlan loh avang hian thla thum chhunga an sum lak luh chu 2%-in a tlahniam a, £ maktaduai 140.3 an la lut thei a. Mipa team chu Ruben Amorim kaihhruaina hnuaiah Premier League-ah 6-na an ni mek a, hmeichhe team chu Marc Skinner kaihhruaina hnuaiah Women’s Super League-ah 3-na niin, Women’s Champions League an khel a ni.
Sum hman chhuah tihtlem tuma hma an laknaah INEOS chuan staff eng emaw zat an bân a, player-te hlawh pawh an tihniam hlawm a. Hetianga hma an lak hnuah hian an sum hman pawh a hma kum aiin £ maktaduai 6.6-in a tlahniam thei a ni.
An training-na thawmhnaw sponsor Tezos nen an inremna a tawp a, a dang an hmuh rih loh avangin sponsorship atanga an sum lak luh chu $ maktaduai 9.3-in a tlakhniam phah a. Heti chung hian United chuan £ maktaduai 640 atanga £ maktaduai 660 vel an lak luh an beisei thu an sawi a ni.