Punjab khawpui, Amritsar-ah Pathianni tuk khan Border Security Force (BSF) mi panga chu an sipaipui pakhatin silai a hmeh puahah an thi tih thuneituten an sawi.
Silai hmet puaktu hi Constable Satteppa SK niin amah pawh a thi ve a. Amah a inkap hlum ve nge mi dangin an kap hlum tih erawh hriat a ni lo tih news agency PTI chuan a tar lang.
Hliam tuar sipai pakhat a awm bawk a, damdawi inah dah a ni.
He thil hi Khasa-a 144th battalion awmna hmun, India-Pakistan inrina, Attari-Wagah border crossing atanga km 12-13 vel chauhva hla a ni.
Zing dar 9:30 leh 9:45 inkar vela thleng niin Constable Sateppa SK hian a service rifle hmangin a thawhpui pangate hi a kap nia an hriat thu officer chuan a sawi.
Thi zingah hian constable leh head constable pawh an tel.
BSF thupuangtu chuan magistrate telin thil thlen dan kimchang chhuina tur thupek tihchhuah tawh a nih thu a sawi a. Thuneitute hian sipaiin a thiante a kah mai chhan hi an sawi lo va, eng buaina nge an neih hriat a ni lo.
Thil thlenna hmunah hian BSF officer lian zawkte pawh an thleng thuai niin PTI chuan a tar lang.