Satel 205 zet, thenkhat phei chu mang mai hlauhawm khawpa vang tawh chi chu Delhi lam pan relah Government Railway Police (GRP) chuan Narkatiaganj railway station, West Champaran district, Bihar-ah an man tih thuneituten Inrinni khan an sawi.
Narktiaganj station-a beihpui thlaknaah hian satel 205 hi lukham tuamnaah lo dah niin Satyagrah Express rela inthiarna hmun atangin hmuh chhuah a ni tih Santosh Kumar, station house officer (SHO), GRP Narkatiaganj chuan a sawi.
“Heng satelte hi tih dan thin pangngaia zu kan dapna atanga hmuh chhuah a ni,” tiin SHO chuan a sawi a, tumah mihring man an nei tel lo tih a sawi bawk.
“Kan thil mante hi nungcha lam buaipuite hnenah kan hlan nghal a, anni hian an damkhaw chhuahna tur lam an lo ngaihtuah zui ang,” a ti.
Maguraha forest range-a mi, Valmiki Tiger Reserve (VTR)a-a Range Officer Sunil Pathak chuan Inrinni khan satel man chungchangah hian forest department chuan ziakin wildlife protection department hrilhin an khawsakna thin hmun tui awmna laia chhuah phalna an dil tih a sawi a. “Thenkhat hi chu mang mai hlauhawm chi ang an ni,” a ti bawk.
Forest department-in an sawi dan chuan satelte hi Asia leh ram dang thenkhatah damdawi atan an hmang nasa thin a. “Tuna mante pawh hi damdawi atana sawngbawl tur leh thil dang atana hman tur a ni ngei ang,” tiin SP chuan a sawi.