- Lalremliana Pachuau
Kan ram ang reng renga pâwl hrang hrang an awm chikimna Society ang, chung pâwl hrang hrangte chu pâwl chak tak an nih deuh vekna ang hi, ram dangah a awm ve meuh lo. An fakawmna lai kan lak vãwng hle lai hian, a lungchhiatthlakna laia erawh kan sawi ngai meuh lo. Kan ramah hian kum lama upa tawh, Mizo Upa Pâwl angte hi pâwl chak tak an ni a. Nuho pâwl lahin thil an ti thei em em bawk. Chutiang bawkin paho awmna pâwl lah an chak ve hle tho bawk. Thalai pâwl chakzia phei chu sawiin a siak lo a nih hi.
YMA chakzia kan hria, VDP chakzia kan hmu nawn reng, lirthei khalhtu pâwl, lirthei neitu pâwl, MHIP thuneihzia, nuho pangpâr khawi pâwl thil tih theihzia, MZP leh pâwl hrang hrangte hi, anmahni tâwkah pâwl chak tak an ni deuh vek a nih hi. Mahse, Mizorama chhûngkaw tin chak lohzia nen heng pâwl hrang hrang chak nachhan hi a inkungkaih tlat lawi si. Ruihhlo laka fihlim lo chhûngkua, nupa inrem mang lo, chhûngkuaa fate hlim lo, nupuite hlim lo, pa ber hlim lohna chhûngkua kan ni fai deuh vek a nih hi.
Pâwla kan phur ang te, kan thahnem ang te, a thatna tura kan thawhrim ang te, pâwlin a tum ti hlawhtling tura kan hah peihzia te, inchhûngkhur chhuahsana pâwl hri veia kan taimakzia te, kan inhman taimakzia rah chhuah chu, pâwl chak leh nung tak takin Zoram a inhung chhuak vek a nih hi. Chhûngkua aia khawtlang leh kohhran, pâwl tâna thahnemngaihna rah chhuah hi, chhûng tinah chhe kher lo se zawng, sawisel tur a awm hauh lo ang. Mahse, a pawimawh ber chhûngkaw ngaihthahna thleng, chhûngkaw awp hneh lohna lo awm avanga buaina rah hi, pâwl chakna hmangin kan ti tawp/ti rem thei ta tlat si lo a nih hi.
Pâwl a vil peih ang leh pâwl tâna engkim a inhuam tluk hian, fate, nupui pasal hlimna tur dik leh enkawl dan dik leh puitlinga enkawlna kawngah taima tlâng ila chuan, chhûngkaw dam lohna tam ber hi a reh tur a ni. Pâwl, khawtlang leh kohhran tâna chhuak reng mai, inchhûngkhura member inhlat leh em em lawi si kan ni zo ta mek a. Pâwl chak tak phena chhûngkaw tawrhna hi, a pawiin a rah khákzia hi sawiin a siak ta lo a nih hi.
Inchhûngkhura inkawm hlim melh melh chhûngkua sawi tur an tam lo tial tial a. Hman hmanah Rev Vanlazuata’n, ‘I inah hawng rawh’ tih lehkhabute khân min au harh zo lo zel a nih hi. Chhûngkaw tlaran; sumpai lamah kher ni lo, Pathianin chhûngkua a dina awm dan tura a ruat ang ni lo, Kristian ramah kan tam tial tial a. Zai pâwl hla mawi tak, ‘In chhûngkua in dam emt’ tih hlate hi tui takin sa thin mah ila, dam lo chunga sa kan ni tih inhre chung siin, a damna turin kan thawkrim peih tak tak tawh lo.
Chhûngkhura kan nihna ang lo hlirin khawtlang leh mi hmuha inlan nuam ti kan ni zo a. Lem chang rual kan inpelin kan infak tawn suau suau a. Mahse, chhûngkaw tuiek, hluihhlawn, keh chhia, bel keh char phui loh kan ni deuh vek lawi si. Kohhranah thu tha tinreng sawituin, a in chhûng a rêl fel zo lo a. NGO hruaitu taima leh felin, a nupui pasal fanau a awp him zo tawh lo. thalai fel tak takin, nu leh pa inngeih lo, ei rûk leh hlemhlet chîng an nei fur a, nula fel kan tihin a unau leh mo a ngeih lo thul!
Nu hman deuh deuh, chhuak reng mai, patling hman tak tak, chhuak zut reng, thalai inhmang tak tak, belhchiandawl si lo kan tam tulh tulh a. In lama inhman aia kohhran leh khawtlanga inhman nuam ti, chet peih zawk kan nihna rah chhuah chhe lutuk hi, ngaihtuah chian a, insiam that kan ngai ta hle a nih hi. Nova chuan lawng a tuk a tuk a, tuilet lakah a chhûngkua a humhim kan ti. Nova an tum erawh kan awm lawi lohna Zoram khawvelah hian, tu nge maw belhchiandawl kan tih hi ni ta le?