Khawhaia neih mek, Tuichangral Games vawi 15-naah Nilaini khan wrestling inelna bik zawh fel a ni a, East Lungdar chu team champion an ni.
Tuichangral Games-a wrestling inelnaah hian team champion East Lungdar hian gold paruk, silver pahnih leh bronze medal panga an la a. Pahnihna, inelna thlengtuin gold pakhat, silver pali leh bronze medal pariat an la ve thung.
Team champion hian trophy an dawng a, pahnihna pawhin trophy an dawng ve bawk.
Tuichangral Games 2026-a wrestling inelna hi kum 19 hnuai lam tana buatsaih a ni a. Inelna kharna hun hi Mizoram Wrestling Association (MWA) President Ngurthansanga leh hruaitu dangten an hmanpui a ni.
Tuichangral Games 2026 hi Nilaini vek khan Khawhai Playground Field-ah South Tuipui bialtu MLA Jeje Lalpekhlua hovin khar a ni.
Tuichangral Games & Sports Association huam chhungah hian khaw 33 an awm a. Kumin games hi April 13 atanga tan kha niin inelna chi nga – football (mipa leh hmeichhia, volleyball (mipa leh hmeichhia), U-16 tan weight lifting, boxing leh wrestling hmanga inelna huaihawt a ni.