Kumin French Open-a lawmman pawisa chu 9.5%-in a pung dawn a, a punna tam ber hi qualifying competition leh a tir lam inkhelte tan a ni ang.
Singles-a champion chuan € maktaduai 2.8 (£ maktaduai 2.44) ve ve an hawn ang a, hei hi a hma aia 9.8% a pung a ni.
Qualifying round atan lawmman pawisa 13% deuh thawin a pung dawn a, main draw first round-a tlawmte chuan €87,000 (£75,700) an dawng ang a, hei hi a hma aiin 11.5% a pung a ni.
Infiammite hian Grand Slam-ah lawmman pawisa tam zawk ngenin hma an la mek a, an zavaia hlawh tlanna atan ruahmanna siam turin an phut bawk.
French Tennis Federation (FFT)-in lawmman an tihpun zat hi nikum aiin a let hnih deuh thawin a sang a; mahse, US Open leh Australian Open-in kumin liam taa an tihpun zat erawh a phak lo thung.
Nikum US Open-ah khan lawmman pawisa 20%-in a pung a, Australian Open-ah pawh 16% velin a pung bawk.
Tournament Director Amelie Mauresmo-i chuan kuminah hian Roland Garros-a player-te awmna hmunah camera dah belh a ni lo ang tiin a tiam.
January thlaa Australian Open-ah khan player-te chu sahuana ramsa ang maia enthlak an ni tiin Iga Swiatek-i chuan a sawi a. Melbourne Park-a a racquet a vaw chhe lai camera-in a lak hnuah Coco Gauff pawhin mi mal zalennna pe tam turin a ngen a, Jessica Pegula-i pawhin thla lak reng chu mi mal zalennna palzutna a ni a ti bawk.
Paris khawpuia thu thar thehdarhtute nena an inkawmnaah Mauresmo-i chuan, “Broadcaster-te hian player-te chanchin hriat chian lehzual an duh a, a dik alawm. Mahse, an mi mal zalennna zahsak kan duh a. Mi mal awm hranna hmun an mamawh a, chu kan dinhmun chu kan sawh sawn lo vang,” a ti.
Player thenkhat chu Roland Garros-ah a vawi khat nan fitness tracker hman phalsak an ni dawn tih an hriatin an lawm hle ang.
Australian Open-ah khan Aryna Sabalenka, Jannik Sinner leh Carlos Alcaraz te chu inkhelh hmain an device-te phelh tura hrilh an ni a; mahse, tunah chuan fiahna neih remtih a ni tawh a, hei hian Wimbledon leh US Open thleng pawhin a huam ang.
Tracking technology hian mut dan, taksa hah dan, rilru hah dan leh lungphu te a vil thei a, WTA leh ATP Tour-ah pawh hman phalsak an ni tawh a ni.
Roland Garros-ah a hma anga thil la awm zel tur chu line judge-te an ni a. Grand Slam dang pathumte chuan kum eng emaw zat liam ta chhung khan electronic line calling (ELC) an hmang tan tawh a, kum 2025 atang khan ATP Tour-ah chuan hman ngei ngei tur a ni tawh bawk.
FFT President Gilles Moretton chuan he technology hi a la tha famkim lo hle a, French tennis kalphungah hian line judge-te hian pawimawhna tak an la nei a ni a ti tlat thung.
Moretton-a chuan, “Kan hawi kual a, hmun danga thil thlengte kan thlir a, a tha famkim lo tih kan hria a, 10% vel a tisual thei a ni,” a ti.