Philippines lailia bawlhhlawh paih khawmna chim avanga thi chu mi 11 an ni tawh tih thuneituten an sawi.
Cebu City-a Binaliw landfill a chim lai hian thawktu mi 100 chuang an awm a. Chhanchhuah hna thawktuten mi 12 hliam tuara la chhuakin mi 20 chuang chin an la hre lo.
Kang thelhtu hotu pakhat chuan ni thum a liam hnu kha chuan ‘dama lak chhuah tur’ an awm a beiseiawm tawh loh tih asawi a, hnawl rit takin a chhilh niin AFP a hrilh.
Hetih lai hian Thawhtanni khan ‘dam an la awm’ nia ngaih theih an hmu leh tih Cebu City Mayor Nestor Archival chuan GMA News hnenah a sawi a, chhanchhuah hna thawh lehnghal a ni tih a sawi.
He thil thleng hian sawi a hlawh hle a, an rama bawlhhlawh an sawngbawl dan thlenga sawi leh sel a hlawh phah.
Environment thuneitute chuan he hmun enkawltu, Prime Integrated Waste Solutions, Inc. chu hna thawh zui an phalsak rih lo nghal.
Company hian Department of Environment & Natural Resources hnenah ‘ni 90 chhungin chhanna’ an thehluh a ngai tih Thawhtannia thu an chhuahah an tar lang a. Department pawhin a chhan leh mawhphurtu dangte chhui chhuah tumin hma an la nghal bawk tih an sawi.
Binaliw landfill hi hectare 20-a zau niin Cebu chanchinbu, The Freeman chuan hectare thum chu bawlhhlawh chhun khawm nan bik hman a ni tih a tar lang.
Chhiatna a thlen chhan chhui mekah ngaihdan awm tawhah chuan tun hnaia ruah sur nasa chu an puh a. Mines & Geosciences Bureau chuan ruah avang hian bawlhhlawhte a huhin a rit sawt a, a tawlh/min ta chiam ni theia a lan thu an sawi.
Philippine-ah hian Cebu ang chi khawpui lianah hian hetiang bawlhhlawh paih khawmna hmun lian leh zau tak hi an hmang nasa a. Mi tam takin ei zawnna atan pawha an hman a ni.