Aizawl: Mizoram Legislative Assembly Conference Hall-ah National Disaster Management Authority leh Disaster Management & Rehabilitation Department tangkawp buatsaihin Mizorama chhiatrupna thleng thei hrang hrang laka chhanchhuah leh chhawmdawl hna sawt leh awmze nei zawka kalpui dan tur sawi hona, ‘Table Top Exercise’ neih a ni.
Ningania State Level Mock Exercise kalpuina tura Table Top Exercise-ah hian Lalbiakfela, Deputy Director, DM&R chuan Mizoram State Disaster Plan sawi fiahna hun a hmang a. Prof. Saitluanga, Department of Geology, Pachhunga University-in Mizorama lirnghing thlen dan leh lirnghing thlen hlauhawmna hmun thenkhat tar lanna hun a hmang a. State Disaster Relief Force dinhmun leh an chetlakna tura hmanrua an neih dan dinhmunte chu Lalpianfela, Addl. SP-in tar langin Dr. Lalrokima Chenkual, Deputy Director, DM&R-in chhanchhuah leh chhawmdawl hna thawk tura khawtlang leh tlawmngai pawlte nen thawhhona an kalpui dan a sawi bawk.
Margaret Lalrinawmi Fanai, Joint Director, Transport-in lirthei chetsualna thleng thei laka inven dan leh hriat tur hrang hrang a sawi a, Mizoram chhunga industry hmun hrang hranga chhiatrupna thlen palha chhanchhuah leh chhawmdawl hna kalpui dan tur ruahmanna chu Lalrinawma, Joint Director, Commerce & Industries Department-in Powerpoint hmangin presentation a pe bawk.
He huna tar lan danin chhiatrupna thlen palha che chhuak thei tur, State Disaster Response Force chu Mizoram Police hnuaia Armed Battalion pariat atangin mi 546 an awm a. Aapda Mitra Scheme 2022-23 kalpuina hnuaiah district panga atangin mi 100 theuh hnenah training pek an ni a. Yuva Aapda Mitra 2024-26 kalpui mekah mi 419 traning pek ni tawhin NCC, NSS, NYK leh Bharat Scout & Guide hnuaia a tul anga che chhuak thei tur thalai 1,130 ziah luh tawh a ni a. Sairang leh Tlabungah tawmhimna ‘Safe Shelter’ pahnih sak a ni bawk.
Brig. Ravinder Gurung (Retd.), Sr. Consultant, NDMA chuan Table Top Excercise chu kaihruaiin, kum 10 chhung khan Aizawl leh a chhehvel km 300 bial chhungah lirnghing magnitude 4 aia na, tum 520 chhinchhiah a nih thu a sawi a. Kum 2020 kha lirnghing tam ber kum a nih thu sawiin tum 75 chhinchhiah a ni.
Zarzokimi, Joint Secretary, DM&R; Chuauhnuna, Director leh Brig. Pushpendra Surian, Commander, 23 Sector, Assam rifles ten he hun hi an telpui a ni.