Aizawl: Excise & Narcotics Minister Lalnghinglova Hmar hovin nimin khan DC Conference Hall, Keifangtlangah Champhaia sorkar leh khawtlang hotute nen ruihhlo do chungchang an sawiho.
Champhai Bawrhsap Mohammad Aaquib kaihhruai thutkhawmah hian minister chuan Champhaia ruihhlo do chu tha tiin a fak a. Ramri district a nih angin ruihhlo lut leh chhuak a tam bik a, Mizo mipuite ruihhloin a tihbuai loh nan an district-in chanvo lian tak a nei tih a sawi.
Khawtlang mipui, a bikin naupang leh thalai zingah kohhran te, khawtlangte leh sorkarin ruihhlo ti lo turin au chhuahpui nasa zual turin a chah a, sikul tinah awareness campaign tun kum chhungin vawi khat tal buatsaih theih ni se a ti bawk.
Khawtlang hruaitu leh sawrkar hotute inkarah thawhhona tha awm se a tih thu a sawi bawk a, ruihhlo do kawngah Champhai district a tul ang zelin sawrkarin a pui ang tih a sawi bawk a ni.
He hunah hian Champhai SP Lokeshwaran R te, Excise & Narcotics Asst. Commissioner C. Thangchuanga leh Assam Rifles, Social Welfare leh YMA-in an hmalakna theuh an sawi bawk.
Champhai Police hian kum 2025 chhung khan NDPS Act hnuaiah thubuai 149 an ziak lut a, mi 260 an man a. Heroin kg 38.477, methamphetamine kg 622.4, crystal meth kg 5.169, caffeine kg 3,000, alprazolam kg 4.470 leh corex gram 1.6 an man bawk.
Ruihhlo man rûnpui, Operation Jericho an kalpui a, nikum khan Phase I a zo a, mi 52 leh motor 17 an man a, heroin kg 9.235, methamphetamine kg 74.852 leh BEDC litre 565 an man a, January atanga March thleng hian Phase II an kalpui leh dawn.
Excise & Narcotics, Champhai chuan kum 2025 chhungin MLP Act hnuaiah mi 183 leh NDPS Act hnuaiah mi 132 an man a. Heroin kg 14.577, methamphetamine kg 125.065, BEDC litre 2,733.100 leh country liquor litre 884.800 an man a, drug awareness campaign vawi 15 an kalpui bawk.