American boxer Ryan Garcia chuan February 21 hian a hnampui, Mario Barrios chu T-Mobile Arena, Las Vegas-ah an inhmachhawn ang.
Interim Lightweight champion pawh lo ni tawh, Garcia inhnek hnuhnun ber chu December, 2023 daih tawh kha niin Rolando Romero lakah a tlawm a. April, 2024-ah inlan lehin Devin Haney lakah chak mah se damdawi hman phal loh a hman avangin Haney laka hnehna a chan hi pawm lovin an match khelh chu an thulh zui a, Garcia hi kum khat hrem a ni zui.
A tumpui tur, Barrios hian vawi 33 a inhnek tawhah vawi 29 chakin a khingpuite vawi 18 lai a knockout bawk.
Barrios hian nikum July khan Manny Pacquiao nen inhnekin chak zawk an awm lo a, Filipino boxer lakah a title kawl lai a humhim a. Hemi hnuah hian a la inlan leh lo.
Barrios chuan “Ka hun a thleng ta, WBC title ka la lai khawvel ka hmuhtir dawn a ni,” tiin a inringtawk hle a, Garcia chuan “February 21-ah world champion ka ni ang,” a ti ve bawk.
Boxer pahnihten boruak an siam thiam a, inhnek hmuhnawm tak a beisei ngam ang.