Food Civil Supply & Consumers Affairs Minister B. Lalchhanzova’n gas pipe hmanga Tripura atanga Mizorama natural gas thlunzawm hna thawh mekte endikin Agartala a tlawh a; project a hlawhtlin ngei theih nan leh a hun taka thawh zawh a nih theih nan hnathawktute chu uluk leh thahnemngai taka thawk turin a chah.
Gas pipeline phum hna a duh anga an thawh chak tawk loh avanga tun aia chak a hna thawh a nih theih nana an hotute dawr dawn tih a lo sawi angin FCS&CA Minister B Lalchhanzova chuan Nilaini khan Tripura Natural Gas Company Limited (TNGCL) pisa, Agartala ah an hotute a kawm a. Minister chuan Tripura-in natural gas an hman tangkai dan belchiang tur te, Mizoramah pawh zau zawk leh tangkai zawka hman a nih ve theih dan turte zir chiang tura kal an nih thu a sawi.
B Lalchhanzova chuan eirawngbawlna gas thianghlim leh tha zawk, pipe connection hmanga hnianghnar leh man tlawm zawk neih theih a ni tur chu Mizo mipuite tan pawh thil hlu tak a nih tur thu a sawi a, domestic mai bakah commercial, industry, transport leh thil dangahte pawh tangkai taka hman ve tum a nih thu sawiin, gas supply a that phawt chuan Industry lian tham tak tak pawh Mizoramah kalpui ve theih a nih tur thu leh thalai hna neilote tan pawh eizawnna siamtu hnar pawimawh tak a nih tur thu a sawi a. Project a hlawhtlin ngei theih nan leh a hun taka thawh zawh a nih theih nan hnathawktute chu uluk leh thahnemngai taka thawk turin a chah.
IGCL leh TNGCL hotute pawhin Mizoram sorkarin an phurpuinaah lawmthu an sawi ve bawk.
Natural Gas Pipeline hi Panisagar Terminal, Tripura atanga intanin Sihhmui, Mizoram-ah Receiving Terminal bun a ni dawn a. Panisagar leh Sihhmui inkar pipe thui zawng hi km 119.5 niin, pipe diameter hi feet 1 a ni a, leimin leh chhiatna dang laka him tur pipe hman a ni a. Pipeline hian Kanhmun, Zawlnuam, Kawrthah, Tuidam, Darlak, Mamit, Lengte te a paltlang dawn a; Panisagar – Sihhmui inkara pipe phum hna hi Indradhanush Gas Grid Limited (IGGL) ten thawkin, Sihhmui Terminal atanga Aizawl khawpui chhunga gas sem darh leh enkawlzui hna chu TNGCL ten an chang ve thung dawn a ni.
Aizawl khawpui bakah hian Mizoram hmun hrang hrangah a tahtawla la semdarh zel tura ruahman a ni bawk.
He Tripura – Mizoram Gas Pipeline Project hi North East Natural Gas Pipeline Grid hnuaia mi niin, December, 2027-ah thawh zawh hman beisei a ni a, tun dinhmunah zaa 45 vel thawh zawh tawh a nih thu IGGL hotute chuan an sawi.
An inkhawm zawhah FCS&CA Minister hian Tripura-a Natural gas hmangtu Industry lian PRAN Beverages (India) Pvt. Ltd., Tripura Industrial Growth Centre, CNG Station leh ONGC hmunpuite a tlawh kual a; eirawngbawl nana natural gas hmangtu pipeline connection 330 awmna Subham Solitaire a tlawh bawk.
Minister hi FCS&CA department Secretary Teresy Vanlalhruaii, Dr. Andrew H. Vanlaldika, Additional Secretary leh Saizikpuii, Director ten an tawiawm a ni.