Aizawl: Mizoram Cooperative Apex Bank Ltd Board of Directors Meeting chu nimin khan Lalnunsanga, Chairman hovin Board Meeting Room Head Office ah an thukhawm a. State Level Banker’s Committee-in a rawt angin bank awm lohna khua, Saipuma Branch thar hawn rem tiin tun financial year chhung ngeia hawng tura hmalak nise a tih a ni.
Meeting chuan bank share lei dil society-te hnenah share lei phalna a pe a. Hetih rual hian Mizo bank a nih angin share leia tan la zel turin Mizoram chhunga society zawng zawngte a sawm nghal.
Meeting hian loan dilna hrang hrang 117 pek a remti a, a vaiin Rs. nuai 2,569 a ni a. Heng loan a pek chhuah zingah hian biak in sakna loan, society loan leh sorkar flagship programme hnuaia mi, Handholding (Banakaih) loan te a langsar zual niin mi mal in sakna loan, business, industry leh agriculture loan te a tel a ni.
Apex Bank hian deposit Rs. vaibelchhia 1,787 kawl mekin loan Rs. vaibelchhia 1,259 a pe chhuak mek a. Sum kawl atanga loan pek chhuah tehfung (CD Ratio) chu za zelah 70.5 a ni.