- K. Hmingthankaia
Operation Black Forest tia April ni 21.2025 atanga Chhattisgarh leh Telangana inkar ramhnuai vela Naxal helho chunga India sipaiten beihpui an thlak tum khan, Naxal- Maoist 31 lai thah an ni a. An hotu lawk, top leader enge maw zat pawh an thi tel a ni. Khami tum, ni 14.May 2025 khan Union Home Minister Amit Shah chuan, ” Naxal helho lakah beihpui kan thlak zel dawn a, kum 2025 March thla tawpah chuan India rama Naxal ho chu nuaibo vek an ni tawh ang. Naxal hel awm lohna, Naxal free India kan ni tawh ang” tiin a sawi a ni.
A sawi ang ngeiin Naxal ho chu an hek heuh heuh khawp mai a. Kum 2025 chhung ringawt pawh khan 317 thah an ni a, 862 man an ni a, 1973 an insurrendered bawk a ni. An zingah hian Central Committee member panga an tel nghe nghe a ni. A hma kum 2024 khan 290 thah an lo ni tawh a, 1090 man an ni a, 881 an lo insurrendered tawh bawk a ni. Hetah pawh hian Central Committee member ringawt pawh 28 lai an lo tel tawh bawk a ni. BJP sawrkar hnu, Amit Shaha Home Minister- na hnuaiah hian Naxal hi nasa takin an ral tawhin an chep sawt em em hrim hrim tawh a ni. Tunhmaa district 180 lai huam chhunga che thin khan, district 12 vel chauhah chep takin an che thei tawh a. 5000 thah an ni tawh a, 10000 an in surrendered tawh bawk a, tam tak man an ni tawh bawk a ni. 2025 December ni 13-a a lan dan chuan, Naxal helho hi ram zim teah, chep takin 500 bawr vel chauh awm tawh anga chhut a ni a. Mahse, a zat chiah hi sawi har a ni a, a chhan chu, man, insurrender leh thah an awm reng bakah, ramhnuai ngaw chhung leh tualchhunga inphum ru an awm nual bawk thin vang a ni. Amaherawhchu, tunah tak hi chuan an tam vak tawh hmel loh a ni. Amit Shaha hun tiam ang ngei hian, March ni 31 2026-ah chuan Naxal ho chu an chimih theih hmel ta viau a ni.
Tichuan, Naxal ho nuai chimih zawh, March ni 31 2026 atang chiah chuan India ram pumah kum thum chhung ruihhlo do beihpui thlak a ni leh dawn ta tih chu, Home Minister chak tak Amit Shah chuan a puang leh ta rup mai a nih chu. Naxal laka beihpui a thlak hlawhtlin dan enin, ruihhlo do beihpui pawh hi a hlawhtlin leh mai a rinawm ta hle a ni. Ni 31 March 2026 chuan Naxal ho chu chimit tawh ngei tura ngaih an nih avangin, March ni 31 2026 atang chiahin ruihhlo do beihpui pawh chu tan ve nghal turin a ti ta a ni. He thu hi Narco Coordination Centre (NCORD) 9th Apex level meeting ni 9.Jannuary 2026-a Vygyan Bhawan, Delhi-a neiha a sawi a ni.
Ruihhlo do beihpui thlakna duangtu NCORD hi chhawng li, a sang ber NCORD Committee chu Union home secretary kaihhruai a ni ang a, a dawt chiah chu home affairs special secretary kaihhruai, executive level NCORD committee a ni ang a, state level-ah Chief secretary kaihhruai NCORD committee leh, district level-ah DC kaihhruai NCORD committee a awm leh dawn a ni.
He ruihhlo do beihpui thlak tur hian Mizoram state chu nasa takin a rawn tinzawn turah lo ngai phawt mai ila. Home Minister pawhin department hrang hrangte chu March ni 31 hmaa an hma lakna tur peih fel vek tur leh, harsatna awm thei chinfel vat a nih zel theih nan hmalaknate enlet reng theihna tur siam bawk tura a tih ang hian, kan state pawhin ngaihtuahna zau zawk tun atanga a sen a ngai nghal ang.
Union home ministry hnuaia hmalakna tur leh, Home Minister chak tak hmalakna a nih dawn avang hian Mizoram tan chuan a lawmawm dawn hle mai. Tlin lo chung chung leh, ngam leh ngam lova kan lo tih ve nilnial ang kha hneh tak leh huai taka rawn ti tawh turah lo ngai phawt mai ila. Chuvangin, kan hotute pawhin tun atang hian tim miah lovin ruahmanna rum deuh leh ril deuh zawkte, zau deuh leh hautak hmel deuha langte pawh an lo ruahman thiam turah i ngai phawt mai ang u aw. Amit Shah hian engtin tak nge hma a rawn lak ang tih hriat a chakawm tawh khawp mai.
Thil pakhat- Hei, nunphung ti hreawm khawpa ruihhlo ngai ho khawsa tam lutuk chu an bo deuh ta duak mai a, a tihzia hle mai.Nunphung ti nuam lo leh thil bo hlau reng renga mipui kan awm kha a ziaawm ta huai a, thla a muang ta deuh e. CYMA leh Sawrkar chungah lawmthu ka sawi e. Mahse, tha thlah lovin tan han la mar pat ula kan va ti ve, a fing phakar zual an la tam a nia aw. CYMA hian Branch-te pawh fuih leh deuh se a tha ang a.
Tin, ruihhlo ngai ho hian an sim mai mai dawn loh avangin, kan ram tana tha ber, kan ram hi ruihhlo ngai laka kan ven fihlim dan tur tha ber chu- a la ti ve lote ven leh zittir uluk hi a ni e. Chumi atana tha ber chu, ruihhlo tih lama entawn tur, tihhmuhtu tur, kaihruaitu tur tuna addict ho khung bo zawh vek hi a ni mai. Vengtina ruihhlo ngai zawng zawng hi a bo a bang awm lovin kum tam tak khung bo ila chuan, kan ram chu ruihhlo lakah a fihlim a ni mai dawn lo’m ni? A leitu tur ber kan rama an awm loh chuan a zuar pawh an awm lo mai ang chu. Phillipine President 16-na Rodrygo Duterte anga an rama ruihhlo ngai leh zuarte thah chimih vek tum ang maia che chu ni ve kher lovin, keini chuan an taksa leh thlarau dam nan kan dah hrang a ni zawk mai dawn si a. Enge in ngaih ve dan le?