Auto Corner
by Ruata
Hyundai i20-ah variant
thar pahnih | 2022 Creta-ah ADAS leh thil thar dang!
South Korea lirthei company Hyundai chuan a lirthei pahnihah thuthar an rawn nei leh ta a. An premium hatchback lar leh tha em em Hyundai i20-ah variant thar pahnih an tichhuak a. Hei hi 1.2L Asta (O) CVT leh 1.0 Sportz DCT a ni. Hei bakah hian 2022 Hyundai Creta lo chhuak turah ADAS leh himna hmanraw dang hrang hrang a awm dawn bawk.
A hma kha chuan Hyundai i20 Asta (O) ah hian transmission lamah manual chauh a awm a. Tuna an tlangzarh thar tak hi i20 Asta (O) CVT variant a ni a, heti a nih chuan Hyundai i20 man to variant bikah hian manual transmission mai bakah automatic transmission a awm dawn ta a ni.
Hei bakah hian a chhuak thar pakhat tur 1.0 Sportz DCT tia kan lo ziah tawh ang hian a man tlawm hret hoa Sportz variant-ah hian DCT (Dual Clutch Transmission) automatic gearbox a awm tawh dawn bawk a ni. A hma kha chuan DCT hi a man to ho Asta hoah a awm thin a. Tuna chhuak thar Sportz DCT hi 1.0 Asta DCT aiin Rs. Nuai 1.05 laiin a tlawm dawn bawk.
Automatic transmission hi kan state-ah hian kan la uar lo viau na a a nei ho chuan khalh a nuamin hahdam an ti em em a, manual transmission aia thlang ta zawk an awm nawk tawh a ni. Tuna Hyundai i20-a variant thar pahnih pawh hi kan state mai ni lo, India ram pum tana thil tha tak tur leh lei hlawh tak tur a nih hmel.
Report thenkhat chuan tuna i20 variant chhuak mek, a man to ber 1.2 CVT Asta leh 1.0 DCT Asta te hi Hyundai in an tihchhuah chhunzawm dawn lo niin an tarlang a. Tunah rih chuan an company official website-ah pawh an la dah avangin a la awm rih dawn niin a lang a ni.
Hyundai hian an premium hatchback chhuan tak, i20-a variant thar pahnih an dah bakah hian thil hrang hrangin he lirthei hi an thawm belh a. Sportz variant bikah hian manual AC chauh awm thin kha automatic AC an rawn dah thar a, Sportz DCT bik pawh hian cruise control a nei thar bawk a, hei hi a hma chuan Asta (O) chinah chauh a awm.
Hyundai i20 Asta pawhin single pane sunroof a nei bawk a, a hma khan 1.0 iMT Asta ah electric sunroof hi a awm thin a ni. Heng variant te hian 8 inch touchscreen neiin connected car feature thenkhat chu an dah tawh lo thung a. A to variant Asta (O) ah hian a Blue Link system-ah voice command an dah thar a ni. A variant hniam Magna ho chuan a wheel rawng danglam bik, gun metal shade a nei.
Hyundai i20 ah hian khawl chi 3 – 82bhp power pechhuak thei 4-cylinder naturally aspirated petrol khawl, 118bhp power pechhuak thei 1.0 litre three cylinder turbocharged petrol khawl leh 99bhp power pechhuak thei 1.5 litre 4-cylinder turbo diesel te duhthlan tur a awm a ni.
2022 Hyundai Creta
Media report hnaivai berah chuan Hyundai Creta 2022 model lo chhuak tur hian ADAS (advanced driver assistance system) a rawn nei tawh dawn tih tarlan a ni a. Hyundai hian an tum dan chuan kum 2022 tawp lamah hi chuan ADAS hi an lirthei changkang leh man to hoah an dah vek dawn a. New Generation Hyundai Tucson hi India ramah chuan an dah hmasak berna tur a ni a, 2022 Hyundai Creta hian a dawt dawn a ni. Hei bakah hian an SUV thar, Alcazar leh Hyundai Verna-ah te pawh ADAS hi an la dah zel beisei a ni.
ADAS-ah hian level 2 autonomous driving assist a awm a, hemi hnuaiah thil hrang hrang blind spot warning, adaptive cruise control, automatic emergency braking leh lane keep assist te a awm a. Tunah hian India ramah chuan MG Astor leh Mahindra XUV700 chiah hian ADAS hi an nei mek a ni. ADAS bakah hian 2022 Hyundai Creta bakah an lirthei man to hoah hian airbag paruk, ESC (electronic stability control) leh Isofix te dah vek a ni dawn a. Tunah rih hi chuan a variant to hoah chauh aribag paruk hi a awm.
ADAS leh himna hmanraw thenkhat an dah belh hi chuan a man pawh a to deuh hret dawn a. 2022 Hyundai Creta hian hmel thar a rawn neih hmel a. Thuthang mek thenkhat chuan 2022 Creta lo chhuak turah hian 360 degree camera, updated BlueLink connected car tech leh digital driver’s display thar te a rawn nei maithei tih tarlan a ni ve bawk a. Hyundai Creta thar tur hi a rawn chhuak har tawh dawn lo niin a lang a, company lam atangin a chanchin chiang leh kim lehzual te pawh a rawn chhuak thuai turah a beisei theih ang.
A khawl lamah hian danglam vak a awm loh hmel a. A khawl pangngai 113bhp power pechhuak thei 1.5 litre naturally aspirated petrol khawl, 113bhp power pechhuak thei 1.5 litre turbo diesel khawl leh 138 bhp power pechhuak thei 1.4 litre turbo petrol khawl te a neih leh beisei a ni a. Transmission lam pawh a ngai ang chiah a nih leh hmel bawk. Hei pawh hi company atangin thuthar fiah zawk lo ngaihchan zel rih a la ngai a ni.