Myanmar tual chhung buaina in ziaawm lam a pan hlei thei lo a, March 5 khan Khawmawi khaw daiah Myanmar sipai leh mipui sipai pawl tangrualte an inkah avangin Zokhawtharah raltlan mi 2,000 chuang an luh belh.
Thudawn danin, kar kalta Inrinni zing khan Chinland Defense Force (CDF)-Hualngoram leh mipui sipai pawl dang CNA, PDF-Zoland, CDM Siyin leh LDF tangrualin Khawmawi dai, Tuithap bula inkulh Myanmar sipaite chu an bei a, inkahna hi India sanaa zing dar 4:30 vela thleng a ni a, darkar hnih dawn an in kap a ni.
Hemi hnu zing dar 8 velah mipui sipai pawl hrang hrang tangrual te chuan Rih hmuna Myanmar sipai camp an bei zui leh a, minute nga chhung vel an inkah hnuah mipui sipai trangrualte hi an inthiarfihlim zui a ni.
Inkahna thleng chungchangah hian CDF-Hualngoram chuan thuchhuah siamin, he inkahnaah hian mipui sipai zingah hliam tuar leh thi an awm lo tih sawiin, Myanmar sipai erawh panga an thih bakah hliam tuar eng emaw zat an awm niin an tar lang.
Mipui sipaiten Myanmar sipaite an bei dawn tih an hriat lawk avangin Rihkhawdawr mipui tam zawk chuan an sahimna zawngin Zirtawpni khan Zokhawthar an pan tawh a, inkahna a thlen hnua Zokhawthar pan leh an awm bawk a, an vaiin mi 2,000 chuang an ni.
Zokhawthar khawtlang hruaituten The Zozam Times an hrilh danin, Zokhawthara tlan lut zinga mi 1,600 velin an chhungte an bel a, belh tur nei lo mi 400 chuangte chu kudam pathumah awmtir an ni a, khawtlangin an ei leh in turte a ngaihtuahsak a ni.
Myanmar tual chhung buaina kal zelah hian tun hnaiah Chin Hills-ah inkahna hi tum eng emaw zat a lo thleng tawh a, Myanmar ram chhunga inkahna thlen tamna hmun nia sawi a ni.
January 29, 2020 khan Khawmawi khaw daiah bawk People’s Defence Force (PDF) leh Myanmar sipai an inkah avangin Zokhawtharah raltlan mi 2,000 chuang an lo lut tawh a, boruak a ralmuan deuh tak avangin raltlante hi an khaw lamah an let leh a, Inrinni khan Zokhawtharah bawk hian an sahimna zawngin an tlan lut leh ta a ni.
Tar lan thin tawh angin Myanmar tual chhung buaina tlansana Mizorama an sahimna zawnga rawn tlan lutte hi Mizoram sorkarin tanpuina a pe thin a, March 1, 2022-a assembly session neihah Chief Minister Zoramthanga’n raltlante harsa loa an awm nan hma an lak zel tur thu a lo sawi chhuak tawh a. Hemi tum hian raltlante tanpuina tur sorkar laipuiah an dil leh mek thu leh inpuih leh theih ngei a beisei thu a lo sawi chhuak tawh a ni.