India captain Sandesh Jhingan leh FC Goa player dangte bakah an club staff-te chuan Indian Super League (ISL) khelh leh turah an hlawh tihhniam an rem ti.
Goa club thuneitute chuan an player leh an hnuaia thawktute chu an titipui tih sawiin an inbiak hnuah hian player leh staff-te chuan an hlawh tihhniam chu an rem ti ta niin an sawi a. Hetianga thutlukna an siam avang hian mahni hmasial lo an nih thu an sawi uar hle.
FC Goa chuan thuchhuah an siam a, “India rama football dinhmun chiang lo tak karah kan club chuan kan player-te leh thawktute kan rawn a. Ngun taka thil kan sawiho hnuah thutlukna duhawm tak kan siam a ni,” an ti.
“First team player-te leh technical staff te chu an tangrual hle a, hma an hruai a, mite entawn tura awmin club tana tha tur ngaihtuahin an hlawh tihhniam an rem ti a. Hei hi thutlukna siam harsa em em tur a ni a, mahni hmasial lo tak an nihzia a lang chiang hle,” an ti bawk.
AIFF Super Cup champion team chuan player leh staff-te tanrualna an hmuh hian zahawm an tih thu leh lawmawm an tih thu an sawi a, “Hetiang hun tak hian khelmuala result tha neih ringawt piah lam thil a keng tel hnem hle tih a lang chiang a. Club chhung mihring inzawmna nghet, rinna nghet leh tanrualna a pawimawh ber a ni tih a lang chiang khawp mai a. Kan zavaia tangrualin hma kan sawn belh zel ang,” an ti a ni.
Tun thla tir lam khan ISL club dang, Bengaluru FC neitu, Parth Jindal chuan an club sum dinhmun tlahniam chungchang sawi chhuakin ISL an khelh zui zel theih nan an player-te hnenah an hlawh tihhniam rem ti turin a lo ngen tawh a. An sum dinhmun an siam that theih loh chuan an club chu tihtawp mai a ngaih phah thei tiin a lo sawi tawh a ni.
Sports Minister Mansukh Mandaviya chuan February 14 atanga ISL khelh tan a nih tur thu puangin club 14-ten tel an tum thu an tichiang tawh a. A puan tukah Jindal chuan an club player-te hnenah ngenna hi a siam zui ve a ni.
ISL 2025-26 khelh theih a nih dawn leh dawn loh a chiang har hle a, AIFF in sumdawnna lama an kawppui, FSDL chuan an inremna, Master Rights Agreement (MRA) chu December 8 khan an titawp a, a thar an ziah duh tawh loh avangin harsatna a thleng chho ta a ni.
All India Football Federation chuan thawhpui tur an zawng nasa a, an hmu thei ta lo a. Supreme Court chuan hetiang lam ngaihtuah tur committee din mah se awmzia a nei chuang lo.
An beidawn tawh hnuah sports minister a inrawlh a, ISL club 14-te nen an indawr zawm leh hnuah 2025-26 season a tel an remti thei ta vek a. Season tan hunah hian club tinin vawi 13 vek an khel ang a, home leh away game an khel zel ang a, a vaiin match 91 a awm ang.
ISL club tin chuan league tan theih nan Rs. vaibelchhe khat theuh an thawh ve dawn a, AIFF chuan season tluana an sum senso tur chu Rs. vaibelchhe 25 niin an chhut a, club tinin an thawh ve chu he mi atan hian hman a ni dawn a ni.
Chanchin sawi chian theih a nih lawk loh avangin ram dang atanga ISL khel eng emaw zat chuan India an chhuahsan tawh a, an la chhuahsan belh zel bawk a. Spanish forward Iker Guarrotxena chuan FC Goa chhuahsanin Indonesian club Persijap Jepara a zawm a. Spanish player dang, David Timor leh Borja Herrera te pawhin an club an chhuahsan tawh bawk a ni.
Spanish player Chema Nunez chuan NorthEast United a chhuahsan a, Spanish footballer tho, Jon Toral pawhin Mumbai City FC a chhuahsan bakah Spanish dang, Juan Rodriguez chuan Kerala Blasters a chhuahsan a. Japanese player Hiroshi Ibusuki chuan East Bengal a chhuahsan tawh bawk.
Tun thla tir lamah khan Morocco forward Hamid Ahadad chuan East Bengal a chhuahsan tawh a, Spanish centre-back Tiri pawhin Mumbai City FC a chhuahsan tawh bawk a, a dang pawh chhuak an awm zui a rinawm.