Aizawl: Rajya Sabha MP K Vanlalvena’n Hnahthial district-a Bualpui H atanga Lawngtlai district Saisihchhuah panna kawngpui sial mek leh Tuipui D lei dawh mek a enfiah.
India leh Myanmar thlunzawmna tur kawngpui sial mek, Hnahthial district-a Bualpui H leh Lawngtlai district-a Pangkhua inkar kawng laih hna thawktu, BRO-in zangnadawmna chhuanlamin kum 2021-2023 inkar khan hna an chawlhsan a, hei hi chhunzawm leh tura Rajya Sabha MP K Vanlalvena’n sorkar laipui hotute a ngen angin kum 2024 tawp lam atangin hna chhunzawm leh a ni.
Bualpui H lam atanga kawngpui sial hna thawh chhunzawm chu chawlhkar kalta Ningani leh Zirtawpni khan MP hian tlawhin, hnathawktu BRP hotute;n an hnathawh dan te an lo hrilhfiah a ni.
K Vanlalvena hian Pangkhua leh Bualpui H dawh zawmtu tur, Chhimtuipui lui chunga lei dawh tur ban phunna lai tur chu hnathawktu ABCI Infrastructure General Manager te nen an en ho nghal bawk.
Chhimtuipuia lei dawh tur pahnih te hi meter 150 leh meter 255 a sei dawh tur a ni a. A thui zawk dawhna tur atan hian Rs vbc 75 leh a tawi zawk dawhna atan vbc. 25 senga dawh tura ruahman an ni. September 2027 ah dawh zawh hman tura ruahman an nih thu BRO EE leh ABCI General Manager te chuan Mizoram MP an hrilh a ni.
Hei bakah hian Pangkhua atanga Saisihchhuah panna tur kawngpui sial hna chu zangnadawmna pek zawh fel hnuah hna tan tura ruahhman a nih thu leh Pangkhua a zangnadawmna pek turte chu thla hnih chhunga pek fel vek an tum thu an hrilh bawk.