Iga Swiatek-i’n bung thar ziah a tumna leh Grand Slam nomawi lak kim vek a tumna kawngah champion tura rinkai dangte ang bawkin harsa angreng takin Melbourne inelna first-round a paltlang.
Australian Open hi World No. 2 Swiatek-in Grand Slam nomawi a lak lak loh awm chhun a ni.
Pole hian Grand Slam nomawi pasarihna lak tuma a bul tannaah hian Rod Laver Arena-ah a che tha nghal lem lo thung a, a serve tha tawk lo va, Chinese qualifier Yuan Yue-i lakah tih sual vawi 34 zet a nei bawk.
Tawnhriat ngah zawk a nihna erawh langin a tawpah No. 130 Yuan-i lakah hian 7-6 (7-5) 6-3 hnehna a chang tho thung.
“Duhthusam chu ni lo mah se thil a kal tluan loh chuan awlsam taka chak vek thei a ni lo va, ka lawm viau tho,” a ti.
“Vawiin hi ni duhawm ni lo mah se ka chak a, a tha tawk hle a ni,” tiin Swiatek-i chuan a sawi bawk.
Rinkai ber ber – Coco Gauff, Amanda Anisimova leh Jessica Pegula te pawhin Thawhtanni khan an inlan hmasak berah hnehna an chang hlawm.
A khelh danah tha tawk lo va, se Czech World No. 44 Marie Bouzkova-i nen second round-a an inhmachhawn hmain Swiatek-i hi a insiam that a ngai dawn.
Swiatek-i hian season bul a tan dan a tha tawk lo hrim hrim a. Poland-ah thla tir khan United Cup-ah champion mah se Top 10 players Gauff leh Belinda Bencic lakah a tlawm tawh.
Swiatek-i ang bawkin Gauff-i pawh a serve-ah duhthusam lovin first round-a Uzbekistan nula, Kamilla Rakhimova laka a chak tumin double fault vawi sarih a nei.
Heng zinga vawi thum phei chu game hmasa berah a ni a; mahse, a hnuah Gauff-i hi a talbuai zui lutuk lo hlauh thung.
“Game hmasa ber kha chu ka nawt reh nghal niin ka ngai a, a hnu lamah kha chuan ka tha chho ta a ni,” tiin 6-2 6-3-in a chak a, Grand Slam-a vawi 75 hnehna a channa a ni.
Grand Slam maltana vawi hnih nomawi la tawh chuan, “Keimah leh keimah pressure inpek nasat loh tumin ka bei ngar ngar a. Hnehna ka chan hian ka duhthusam ka hlen chauh thin a, khatianga harsa taka bul tan hnua insiam thaa tha taka ka khel zui thei kha ka inchhuang hle a ni,” a ti.
Kum 21 mi, Gauff-i hian Olga Danilovic-i a tum leh dawn a. Serb hian Pathianni khan kum 45 mi, Venus Williams a hneh.
American 4th seed Anisimova- chuan darkar khat chhungin Swiss Simona Waltert-i chu 6-3 6-2-in a hneh.
Season hmasaa US Open leh Wimbledon final thleng, Anisimova-i hi Melbourne-a nomawi la thei tura beisei zinga mi a ni a, amah pawhin Grand Slam final vawi thum lut thei nih ngawt aia sang thlen a tum tih a sawi.
American 6th seed Pegula-i pawhin minute 66 chhungin 6-2 6-1-in Russian Anastasia Zakharova-i a hneh bawk.