24 Megawatt Tuirini Small Hydro Electricity Power Plant dinna tur lungphum chu Thawhtanni khan Tuirini kamah Chief Minister Lalduhoma’n a phum.
He power plant hi Externally Aided Project sum hmanga Rs vbc 676.98 senga thawh tur niin, New Development Bank, Sanghai atanga loan Rs. vbc 676.98 hmanga thawh tur a ni a. Kum nga chhunga zawh tura duan a ni a, power house-ah hian Mw 12 pe chhuak thei khawl pahnih, an pahnih belhkhawm Mw 24 tling tur bun tura ruahman a ni.
Lungphum phum puala inkhawmah chief minister chuan power siam chhuahna lama hma an sawn theih nan power minister leh P&E department-a thawktute inpekna a sang tih sawiin, lawmthu sawi a. Tuirini SHP chu Congress sorkarin kum 2016-ah hma an la tan a. A bul tanna tur US dollar nuai 3 kha MNF sorkarin dawng nghal lovin a reh ta vang vang a, ZPM an sorkar hnuah thahnemngai takin an tinung leh a, tihtak zeta hnathawh duhna neih chuan thil tih chhung a rei lo thin tih sawiin, tunah hian a lung an phum theih phah tih a sawi.
Lalduhoma chuan kum 54 chhunga sorkar hmasaten kawlphetha an thar chhuah aia tam thar chhuah hman an tum a, kum nga chhungin Mw 50 tal thar chhuah hman an tum a, an hman ta lo a nih pawhin kum nga an pelh tam a rin loh thu a sawi a. Mizoram chu power-a a intodelh loh avangin a chhit manah Mizoram budget a hek hle tih a sawi.
Chief minister chuan sorkar laipuiin power supply lama India ram a intodelh theih nan kawng hrang hrangin hma a la a, mahni mamawh khawp power nei lo state-te tan power leina sum leh pai a hautak tial tial a. Chuvang chuan, mamawh khawp power thar thei tura chak taka ke an pen a ngai a. Chu mi kawnga an hmalakna pawimawh tak chu tuna a lung an phum, Mw 24 Tuirini hi a ni a. Chak taka thawh a, a hun taka zawh an tum dawn tih a sawi.
Thla hmasa lawk khan Thenzawl Solar Power Plant, Mw 10 pe chhuak thei an hawng a, Sumsuihah Mw 5 pe chhuak thei tur solar plant an thawk mek bawk a, hna zaa 20 an thawk tawh a. Thenzawl leh Sumsuih solar plant hi Mizoram ta liau liau a ni a. Tunah Mw 24 Tuirini lungphum an phum leh a, Mw 132 Tuivai pawh chak taka bawhzui zel a ni tih sawi bawk.
Inkhawma khualzahawm, Home Minister K Sapdanga pawhin thu sawiin hun rei lote chhunga hmasawnna duhawm tak tak an hmu chho mawlh mawlh hi lawmawm a tih thu a sawi a. Tuna a lung an phum Tuirini chu a puitlin hunah chuan Mizoramin a puala a neih len ber a ni dawn a, a hlu hle tih a sawi.
P&E Minister F. Rodingliana chuan lungphum inkhawm a kaihruai a, B. Lalchhanzova, I&PR Minister leh Lt. Col. Clement Lalhmingthana, MLA te an tel bawk.
- Tuirini Project chanchin tawi:
February 5, 2024 khan P&E Department chuan Externally Aided Project (EAP) hnuaia thun turin proposal state sorkarah a theh lut a, State Level Screening Committee chuan April 4, 2024 khan ngaihtuahin a pawm a. Department of External Affairs (DEA) Screening Committee chuan ni February 28, 2025 khan External Funding turin a rawn pawm ta a ni.
New Development Bank-in a funding tura tih a ni a, project cost zaa 80 hi loan angin NDB atangin lak a ni ang a, central sorkarin a rul ang a. Project cost atanga zaa 20 hi state sorkar tum ve tur a ni. Total cost of project hi Rs. vbc 676.98 a ni. Kum nga chhunga thawh zawh tura ruahman a ni.