Manchester khua a football club pahnihte an inthlau tak zet a. Premier League champion Manchester City in an hmelma Manchester United chu kawng engkimah thununin 4-1 in an sawp.
Etihad Stadium a inkhelah hnehna an chan avangin City hi point rukin anmahni umtu Liverpool lakah an sang zawk a. City hian goal li khung mahse inkhel kaldan thlirin a aia tam khung thei an ni.
Mikhual team in forward Cristiano Ronaldo leh Edinson Cavani te bakah Raphael Varane leh Luke Shaw te an chhawr thei lova, an khingpuite hi tha zat zawk leh ball inpek kualah an pha lova. City tan Kevin de Bruyne chu a khaipa berah a \ang.
Belgian midfielder in minute 5-naah City goal hmahruai a khung a. Hei hi minute 22-naah Jadon Sancho chuan Manchester United tan goal mawi khungin a sut.
Nimahsela City goal bawh a na a, United an talbuai telh telh a. Minute 28-naah De Bruyne bawkin United tlarhnung in ball an pet chhuah theih loh chu remchangah la in goal a khung a. Second half-ah pawh City chungnung hle in minute 68-naah De Bruyne corner a\angin Riyad Mahrez-a’n goal a khung a. Huntawp dawnah Mahrez bawkin an goal hnuhnung ber a khung.
Manchester City boss Pep Guardiola chuan, “A tir a\angin kan khel\ha nghal hle a. Ralf khan an rilru puthmang thlak tumin a siksawi a, mahse second half-ah khan McTominay leh Fred te hnungah khan hmunawl kan hmuh belh thei \hin a, kha kha remchangah kan la.” tiin an inkhel a thlirlet.
Pathianni zan inkhel dangah Arsenal in Manchester United an lehpel a, a sang pali zingah inhlangkai turin 3-2 in Watford lakah hnehna an chang.
Vicarage Road-ah Gunners tan Martin Odegaard, Bukayo Saka leh Gabriel Martinelli ten goal an khung a. Hornets tan Cucho Hernandez leh Moussa Sissoko ten goal mawi an khung ve bawk.