Philippines chhim lam vaukam hnaih tuipuia passenger leh thawktu mi 350 chuang phur lawng pilah mi 15 vel an thi.
A zawn hna thawktuten MV Trisha Kerstin 3-a chuang zinga mi 316 chu an chhanchhuak thei a; mahse, chin hriat loh mi 28 an la awm mek.
Bungrua leh mihring phur thei lawng hi an ram chhim lam thliarkar lian ber, Mindanao atanga chhimchhak lam hret, Jolo thliarkar pana kal niin Thawhtanni zing dar 01:50 (India-a Inrinni zan dar 11:20) vel khan harsatna an tawh thu an thawn chhuak.
Thuneitute chuan chetsualna thlen chhan an chhui nghal mek tih an sawi a. Philippines hi thliarkar 7,100 vel awm khawm ram niin an thliarkarte inkalpawh nana an hman ber lawng chetsualna thleng hi a tam hle.
Philippine Coast Guard thupuangtu, Noemie Cayabyab-i chuan, “Dam chhuakte hnen atanga hriat dan chuan chetsualna an tawh lai hian tui a phul nasain a chak hle,” tiin TV-a an kawmnaah a sawn niin AFP chuan a tar lang.
Basilan Governor Mujiv Hataman-a’n Facebook-a video a dah chhuahah chuan an chhan chhuahte hi puankawpa tuamin rescue boat (chhan chhuahna lawngleng)-ah an chuang tih hmuh theih a ni.
Chhan chhuahte hi an tam avangin hna thawktu an indaih lo hle niin Basilan emergency responder Ronalyn Perez chuan AFP a hrilh a. “Chhan chhuahte an rawn lawn sup sup a, thawktu indaih lohna a thleng nasa hle,” tiin a sawi.
Philippines-ah hian lawng an hman tangkai ngaihtuahin an lawngte an enkawl tha lo va, an phurh hnem theih em bawk avangin chhiatna an lo tawng fo tawh thin a. Chhiatna thleng fo mah se a chuan man a tlawm avangin Filipino-te hian lawnga zin hi an la ching ber tho a ni.
May, 2023 khan mihring phur lawngah kangmei chhuakin mi 28 an thi a. Thi zingah hian nausen thla ruk mi telin naupang pathum an tel nghe nghe.
Hemi hma kum pawh hian lawngleng tleng chak chi mi 134 phurah kangmei chhuakin mi pasarih vel an lo thi tawh bawk.