Aizawl : ZPM Thalai President Jeje Lalpekhlua, MLA chuan mipui hriselna atana a insenso ZPM sorkarin a hreh dawn lo tih sawiin, January ni 16, 2026 thleng khan Mizoram Universal health Care Scheme (MUHCS) hnuaiah damlo inenkawlna senso Rs vbc 115.25 pek tlak a ni tawh tih a sawi.
Aizawl Press Club-a thu thar thehdarhtute a kawm tumin ZPM Thalai President chuan, mipui hriselna atan a insenso hi ZPM sorkar chuan a hreh dawn lo a, sorkar hmasa te angin damlote bill hi rei tak tak bat a la awm lo tih sawiin, “Cashless nilo, bill ngai te pawh reilo teah a la pe tla zel a ni,” a ti.
South Tuipui bialtu MLA ni bawk Jeje Lalpekhlua chuan, April ni 1, 2025 atanga January ni 16, 2026 thleng khan MUHCS hnuaiah damlo 68,022 enkawl niin, an senso Rs vbc 115.25 pawh mipui sorkar chuan a pe tla tawh tih a sawi bawk.
Jeje Lalpekhlua sawi danin, Mizoram pumah September ni 16, 2025 thleng a MUHCS-a inziak lut hi chhungkua 20,198 an awm a, an zinga 17,705 (87.65%) chu General ward hnuai a an ni a, Semi Private ward hnuaiah chhungkua 1,602 (7.93%) leh Private ward hnuaiah 891 (4.41%) an awm.
Ruang phurh chungchangah ZPM Thalai President chuan, tun dinhmunah Mizoram chhunga chhiat tawkte ruang 1,680 chu ZPM Sawrkar chuan an phurh sak tawh a, ruang phurhna atan hian Rs 175,85,602 a hmang tawh tih sawiin, tunah hian ruang phurhna bill 80 buaipui mek tih a sawi bawk.