UN hnuaia naupang enkawltu pawl bik chuan Israeli thuneituten an dan avanga kum hnih leh chanve chhung an hmuh theih loh hnuah Gaza-ah sikul mamawh leh lehkha zirna hmanrua a lut veleh ta tih an sawi.
Naupang zirna atana pawimawh chi hrang – pencil, exercise bu leh an infiamna atan wooden cube te chu a lut leh ta tih UNICEF chuan Thawhlehni khan a puang a ni.
“Kan nei leh ta a, karlehah 2,500 lo lut leh turin kan pawm fel tawh bawk,” tiin UNICEF thupuangtu, James Elder-a chuan a sawi.
Israeli sipai hnuaia Gaza Strip-a puihna lut viltu, COGAT thupuangtu chuan tun hnaiah UNICEF chu text book tih loh zirna atana mamawh dang luhtir an phalsak thu a sawi a. Indo lai pawh khan an luhtir thu a sawi a; mahse, eng angin an luhtir hriat a ni lo.
Gaza-a naupangte zirna hi indona avangin a buai phah hle a, sikul exercise book leh pencil telin puihna luhtir phalsak a ni lo va, zirtirtuten an mamawh an nei thei lo va, naupangte pawhin zana êng awm mumal lo hnuaiah an zir a ngai bawk niin Elder-a chuan a sawi.
Indo chhung khan naupang tam tak chu tui zawn ringawt ngai avang pawhin zirna an chawlhsan nasa a. A ram pumah ei tur kham an nei zo lo a ni.
“Heng hmanraw tel lo hi chuan naupang leh UNICEF ang pawltan chuan zirna kalpui theih a ni lo va, tunah erawh chuan thil inthlak kan hmu ta nge nge a i,” tiin Elder-a chuan a sawi.
UNICEF hian hian Gaza-a naupang sikul kai rual zahve vel, 3,36,000 zirna hi a pui a. Hamas-in October, 2023-a Israel a beih avanga indona chhuak zuiah sikul building a chhiat nasat avangin zirna hi puan inah kalpui ber a ni tih a sawi bawk.
Sikulte hi 97% ve chhia anga ngaih a nih thu UN-in July thlaa thlalem hmanga an dinhmun a thlirnaah tar lan a ni.
Israel hian a hma khan Hamas leh hel pawl dangte chu civil mite chennaah tawmin sikulte pawh tawm nan an hmang a, civil mite chu inphen nan an hmang nasa niin a lo sawi tawh thin.
UNICEF-in zirna a kalpuina ber hi Gaza Strip laili leh chhim lamah a ni a, hmar lamah erawh thil a harsa rih a. Elder-a chuan indo tawm lamah khan hmar lam hi chu an sawp nasa zual niin a sawi.
Hamas-in October 7, 2023-a Israel chhim lam a beihah khan mi 1,200 vel an thi niin Israeli-te chuan an sawi a. Israel-in phuba laa a beih letnaah Palestinian 71,000 vel an thi niin Gaza-a damdawi in thuneituten an sawi a. Naupang pawh 20,000 vel thi anga chhut niin nikum October 10-a inkahhai puan a nih hnuah naupang 110 an thi tawh niin UNICEF chuan a sawi bawk.