MPCC chuan Lengpui Airport ram sira Indian Air Force hnena ram hralh vang te, MGNREGA hming leh a kalphung thlak avanga leh India ram hmun hrang hranga Kristiante tawrhna avangin vawiin hian kawngzawh an huaihawt dawn a, Kristian tawh phawt chu tawiawm turin an sawmin an ngen.
Ningania Aizawl Press Club-a thu thar thehdarhtute an kawmnaah Congress Spokesperson Lalbiakzama chuan kawng zawh an huaihawt tur chungchang hi sawi fiahin, Lengpui ram IAF kuta hralh danah rorel lai, ZPM leh MNF-te inkarah inpuhmawhna leh inhnialna a tam a. Chanchinbu leh social media atanga an thil lo hriatte chuan a barakhaih a, party pahnihte kara inpuh tawnna leh thil chianglo awmte mipuite hnena puangzar turin sorkar an phut a, thil dik lo titu an awm a nih chuan chhuichhuaha dan anga hrem ngei an phut tih a sawi.
MGNREGA thlakna VB G-RAM-G-a ni 100 aiah ni 125 chu a tha zawk tih ngaihdan a awm a, a lan dan maiah chuan a that hmel zawk mah se MGNREGA-ah chuan ni 100 kuthnathawktute inhlawhna tur kha thutiam delhkilh a ni a, dan tharah hian guarantee lam sawi rik a ni tawh lo.
MGNREGA-ah chuan hlawh hi central sorkarin 100% a tum a, dan tharah chuan hmarchhak state-ten 10% an tum dawn a, state liante chuan 40% an tum thung ang a. Mizoram ang sorkar kal ve hram hram hian 10% a pe ve thei zel ang em? Nge central scheme tam tak 10% tum theih loh vanga zuzi ta ang hi hmabak a nih thu a sawi bawk.
MPCC spokesperson chuan 2014-a BJP-te central a an rawn sorkar atang khan India ramah Muslim leh Kristian-te cheksawlhna leh nekchepna a hluar a. Kristiante pawhin nekchepna leh cheksawlhna an tuarin an tawng tam ta hle a, kum 2014 atanga tun thleng hian a let sarihin a pung hman niin a sawi.
Lalbiakzama chuan, “Central BJP sorkar hotute an ngawi tlat hian India ramah minority-te tan dikna rorel ‘justice’ a awm tawh lo tih a tilang a. Tun ang zel a nih hi chuan a punlun tawlh tawlh dawn tih hi a chiang a. State sorkar hotute leh India parliament-a thu kan MP-te au chhuak ngam lo mah sela keini Kristian ram tia inchhal thinte hian kan dikna chanvo hum tur hian aw kan chhuah ve a hun tawh a ni lo’m ni? A thu a kan la beih let theih lai hian tan ila ang u,” a ti.