ZPM Media Chairman B Lalchhanzova’n Lengpui leh Sihphir ram Indian Air Force (IAF) hnena hralh chungchangah mipuiin thu dik an hriat chu an chanvo a nih avangin CBI chhuitir ngei an duh tih a sawi a, eptu party-te chu FIR theh lut turin ngei se an duh tih a sawi.
Inrinni khan ZPM media chairman leh a thawhpuiten Aizawl Press Club-ah thu thar thehdarh tute kawmin IAF-in Lengpui leh Sihphir ram a lak chungchanga thil awm dan an sawi fiah a. He thilah um zui tur tam tak a awm ngei ang a, mipuite pawhin thu dik hriat hi an chanvo a nih avangin ZPM party chuan CBI chhuitir ngei an duh tih a sawi.
Revenue minister ni bawk chuan a tirah chuan IAF-te hian Zopuitlang, Theiriat ram, Lunglei-ah ram acquire an duh avangin the Mizoram Land Acquisition, Rehabilitation & Resettlement Act, 2016 hmanga hma lak tum zet mah se, August 2, 2018 khan defence ministry-in Mizoram chief secretary hnenah Zopuitlang ram an duh loh thu leh hmun remchang an zawn zel thu thlenin leh hmun zawnpui turin a ngen a. July 15, 2019 khan IAF Hqrs., Eastern Air Command chuan revenue secretary hnenah Lengpui Airport chhehvel leh Lungdai tlangdungah ram duh ang an hmuh thu leh Aizawl DC chu hma la tura hriattir tur leh NOC te an mamawh thu a hriattir a. Revenue dept. chuan July 18, 2019 khan Aizawl DC hnenah hriattirna pein a tul anga survey tur leh report pawh Eastern Air Command, Shillong hnenah theh lut vat turin a ti a. IAF-in defence ministry atanga ‘in principle approval’ an hmuh thuai chu thil tul tak niin, Aizawl Addl. DC chu ‘single point contact’-a hmang tur leh technical area requirement thila co-ordinate-tu atana hmang turin MNF sorkar khan a ruat tih a sawi.
B Lalchhanzova chuan September 2, 2021 khan Aizawl DC chuan Defence Estate Officer, Guwahati hnenah GPS coordinate sa thlap survey map thawn niin ram neitute leh khawtlang aiawhte nen an thil phutte sawipui tawh thu te a hriattir a. Hemi tum hian ram man tur sawi fel a nih thu te leh ram man pawh sq. feet zelah Rs. 185 an pawm tlan thu lAF hnenah hian hriattir a nih thu a sawi a. Aizawl DC kutah indawr leh hmalakna tur thuneihna sang tak pek a nih avangin ‘Out-right purchase of land leh negotiations’ chu DC level hian hma an la zui ta zel tih a sawi.
RFCTLARR Act, tlawhchhanin state sorkar chuan thuneihna a neih angin Social Impact Assessment (SIA) chu national security thil a nih avang leh a hmanhmawh thlak avangin exempt a ni ta a. Ram chu compulsory a nih avangin Preliminary Notification Section 11-in thuneihna a pek angin May 15, 2025 khan revenue dept. chuan notification a chhuah ta a. IAF an hmanhmawh avangin final/declaration (notification) chhuah hmaa preliminary notification-in a phutte chin fel nan thla hnih chhung IAF hian sorkar an ngen a, ram neitute nena an inbiakrawn fel tawh avangin phalsak an ni a. Thil tul hrang hrang buaipui a nih hnuah preliminary notification chhuah ni, May 15, 2025 atanga chhiara 62-na, July 22, 2025-ah revenue dept chuan final land acquisition notification a chhuah tak avangin ram lakna man dawn tur, Rs.1,98,78,55,155 chu Defence Estate Office (DEO), Guwahati-in Aizawl DC account-ah a thun tih July 9, 2025 khan a hriattir a, Aizawl DC chuan July 24, 2025-ah sorkar pawmpuina a dil a. Dilna ngaihtuah a nih hnuah chief minister pawmpuina lak niin Mizoram sorkarin August 1, 2025-ah DC hnenah final approval a pe ta tih a sawi.
B Lalchhanzova chuan uluk taka document-te an chhui leh an indawr tawn dan an en let hian MNF sorkar lai khan lo tifel hman ta se, IAF hnenah hian chatuan atan Mizoram leilung hi an lo hralh fel hmak dawn tihna a lo ni a, mipuite pawhin an hre lo rei viau mai thei tih a sawi bawk.
ZPM sorkarin thil awm dan a lo hriata a zirchian hnuin, MNF-in ram hralh a lo tum dan outright purchase chu a him lohzia hriain land acquisition dan ang thlapa hmalak tha a tih angin hmalak zui a ni tih sawiin B Lalchhanzova chuan, “Tuna IAF ram lak hi a hawha hawhtir, lendlease kalphung anga kalpui tur a lo ni ta a. Defence ministry chuan form awmsa hmangin Rules 7 hmanga an rawn dil hunah state sorkar chuan Rules 7 (3) (a) hmangin a hawhtir thei ang. Dan ang taka IAF hnena ram hi hawhtir tur a lo nih tak avangin Lengpui leh Sihphir ram hi DC Aizawl kutah a awm ta ni. IAF chuan ram hawh turin Mizoram sorkar hnenah a dil dawn chauh a, an hawh hun chhung tur pawh thu tlukna a la awm lo,” a ti.
Ram hralh chungchangah CBI chhuitir ngei an duh a, hma la turin revenue minister kal chhuak ta, MNF Gen Hqrs Treasurer Lalruatkima leh Mizoram chief secretary hlui, tuna MPCC Sr. Vice President Lalnunmawia Chuaungo te hian CBI-ah FIR thehlut ngei se kan duh tih sawiin B Lalchhanzova chuan, “Kan ngaichang dawn a. An thehlut ngam lo a nih chuan eng emaw tak awmah kan ngai ang,” a ti a. Chief Minister Lalduhoma kaihhruai sorkar chu he ram leina thilah hian a kut a fai hle tih a sawi bawk.
Zawhna chhangin B Lalchhanzova chuan Sihphir ram neitu, Zoramthanga tih chu chief minister hlui a ni em tih chu document atanga a lan dan chuan an hming sign a inang hle tih a sawi.