Lengpui Branch YMA in kumpuan an hawnna hmanpuitu Central YMA president chuan ruihhlo zawrh hmanga hausate chu it lo a, kan ngaihsan loh a ngaih thu a sawi a, zawma, hriatreng atan a tha hle.
Ruihhlo kalkawng nia sawi kan nih avangin nitin man sen loh ruihhlo a rawn lut ruih ruih a, man chin awm mah se, kan man seng lo tih a hriatna chu kan thalai tam tak a bawiha tangin, an ruihna tur an la hmu thei zelte a ni pakhat awm e.
Ruihhlo tawlhtute lah an hausa thur thurin a lang a, dan dik taka sum lalut tan pawh sum neih a har nen, kan beisei loh leh rin loh deuh deuh hausa an awm rawn thar zel a, heng mite hi an sumdawnna kan hriatpui lem loh, vantlang tana sum thawh hreh lo tak tak an ni thin bawk nen, ngaihtuah chian chuan central YMA president thusawi hi ngaihtuah zui ngai tak a ni.
Ruihhlo tawlh hmanga sumdawngte hi a market a that em avangin an hausa chak hle a, vawikhat tih fuh phei chuan a sum hlawm a lian si, zawngchhang awl tak niin an sawi bawk. Chung mite lah chuan sum an ren lo a, vantlang hmaa lan mawi nan pawl hrang hrangah tanpuina pek an hreh lo a, hmingthat an hlawh leh lel thin bawk nen, kan inthliarhran thiam chu a hun viau tawhin a lang.
Hemi do tur hian keimahni lam pawh kan kut lo tifai ila, ruihhloa sumdawngte sum it lo tur leh ngaisang lo tura inzirtir chungin theihtawp chhuahin ruihhlo i do tlang ang u.