Aizawl: BJP Mizoram Vice President Vanupa Zathang chuan Israel tan BJP an tawngtai thin laiin, Congress party erawh Hamas tan an tawngtai thin thung tih a sawi.
BJP Mizoram chuan nimin khan Upper Republic-a an party pisa karthar inhlanna leh political session an nei a. He hunah thu sawiin Vanupa Zathang chuan, tun hma atang tawhin Mizoram chuan Pathian hnam thlante an nih avangin Israel ram chu a ngaihluin, buaina a awm hlek chuan a tanin a tawngtaipui thin a. Chutiang a nih laiin, Congress kaihhruai UPA in ro an rel laiin, Israel hi an thian tha an ni ngai lo va, Israel hmelma Palestine ram lam an be tha thung a, Israel nen inkungkaihna tha an nei ngai lo niin a sawi.
Vanupa Zathang chuan Congress Party-ah hian Muslim hian hmun thuk tak an chang a, an zawlpui ram zawk Palestine, Hamas hel ho awmna, Muslim ram an tlawh thin a, Hamas ho lam tan an tawngtai thin a. Mahse, BJP Sorkar a lo piang a, PM Modi chuan Israel nen an inthian thatna a ngaih pawimawh avangin Israel lam a hawi thung a, Israel PM meuh pawhin Modi-a’n a tlawh vawikhat naah pawh, hetiang hun an lo nghah rei tawh thu Israel prime minister pawhin a sawi hial tih a sawi.
Tun hnaia PM Modi-a’n Israel a tlawh tumin, Israel Parliament Knesset-ah thu a sawi bakah Israel Parliament chawimawina sang ber, Speaker Of the Knesset Medal an lo hlan hial avangin, BJP chuan Isreal ram tan tukverh te an hawng a, Israel tan an tawngtai thung tih sawiin, “Hei ringawt pawh hi Mizoram mipui hian kan ngaihtuah ve a hun ta, Congress Party leh a thuihhruai ten dawt hmanga BJP an beihna thanga kan awhna hi kan chhuah vat loh chuan kan state pa chhe tak hma lam hun hi a thim hle dawn a, thalai tam tak beidawng mek te hmakhua hi ngaihtuah ngam loh khawp a ni ang,” a ti.