Aizawl: Shillong-a Assam Regimental Centre (ARC)-a hri lengin chu ARC-ah bak hmuhchhuah a la ni lo va, Mizoram mipui tan chiaina tur a awm lo.
Integrated Disease Surveillance Programme (IDSP), Directorate of Health Services, Aizawl-in tun hnaia Shillong ARC-a Meningococcal Meningitis (Thluaka khawsik lut) natna ni a rinhlelh hrileng chungchanga Thawhtannia an thuchhuahah, hemi chungchang hi uluk takin thil awm dan an thlithlai reng tih an sawi a. Tun dinhmunah chuan he natna hi ARC bak, hmun dangah hmuh a la ni lo va, Meghalaya sorkar pawhin theihtawp chhuahin hri darh loh nan hma a la a, he hri leng hi tai darh lova control a nih avangin Mizoram mipuite tan lo chiaina tur a awm lo tih an sawi.
Tun dinhmunah he natna hrileng hi Mizoramah hmuh la ni lo mah se, he natna chungchangah Meningococcal natna hi Neisseria menigitidis in a thlen a ni a, hei hian Meningitis leh Meningococcemia condition-te a thlen thei a ni.
Natna lanchhuah dan chu khawsik sang lo awm thut; lu na nasa; nghawg khawng; luak/luak chhuak; taksa duk; taksa dâng leh taksa eng; nikhawhrelo leh taksa khawl hnathawk thei lo te a ni a. Natna inkaichhawn danah inhnaih taka awm/khawsak; khuh; hahchhiau leh taksa atanga tuiril chhuak te a ni.
Inrinhlelhna neih chuan rang taka damdawi in pan, puipunnaa kal loh, mask vuah, khuh leh hahchhiauvin ka hup tur, kut sil ngun leh sanitizer hman tur a ni. He natna hi a chhuak thar a ni lo va, doctor-in a chawh antibiotic hmanga enkawl dam theih a ni an ti bawk.