Aizawl: MNF President Zoramthanga chuan Mizoram independent puan chu movement dangin an tih ve theih loh, Pathian rem fel ang thlapa kal a nih thu a sawi.
Thawhtanni khan MNF chuan Mizoram Independent puan kum 60-na ‘Diamond Jubilee’ chu Mizoram hmun hrang hrangah a lawm a. A lawmna pui ber, Vana Pa Hall-a neihah MNF president chuan Mizoram Independence puan kum 60-na tling thei tura MNF nunna zuah zel a la ni leh MNF Founder President Laldenga nupui, Biakdiki pawh thu sawi theia a la awm chu Pathian hnenah lawmthu a sawi a. MNF chu kum 1961-a din a ni a, tunah kum 65 hmel a hmuh tawh tih sawiin, “Hengte hi movement dangin an tih ve theih loh, Pathian rem fel ang thlapa kal a ni,” a ti.
Zoramthanga chuan India independence lai khan East Pakistan-a a awm te, Burma rama awm duh te, India-ah emaw, anmahni awptu British hnuaia la awm zui duhte leh independence duhte an ni nawk hlawm a. August 15, 1947 khan Mizoram chu India ramah an awm ta tih hre lo tam tak a hun lai khan an awm a, anmahni awptu ber British lah an liam daih a, agreement sign leh ban phartirna pawh awm lovin India-ah khan an awm ta ringawt tih a sawi.
Hei tak hi Laldenga te khan India prime minister hnenah India chu republic a niha constitution an siam lai khan India siamnaah an tel ve lo va, barhluih an nih thu an sawi tih sawiin Zoramthanga chuan, “India ramah kan tel ve dawn a nih pawhin Mizoram tana tha leh him tur kan duhzawng kan sawi ve thlenin, chuti ni lova constitution inbarhluih ringawt chu thil fel lo tak a ni an tih chu khatih laia Prime Minister Lal Bahadur Shastri pawh khan hnial ngaihna a hre lo, ‘mi thiamte ka lo rawn phawt ang e’ an tih hnuah an intiamna bawhchhiain sipai a rawn tir lut ta a ni,” a ti.
“Hun a kal zel a, kum 1966 February 11-ah Assam Chief Minister Chaliha chu Pu Denga’n biain, ‘Sipai kan tir lo ang in ti si a, enga ti nge in rawn tirh leh si?’ tia a zawh chuan, ‘Ka rawn tir lut lo thei lo.’ tiin a lo chhang a. Pu Denga’n buai ai chuan Chaliha chu biak a tum leh a, Chaliha chuan a lo be duh ta lo va. Keini pawhin kan tih tur ngaihtuahin March n1, 1966 khan Mizoram independence kan puang ta a, kan inkap tan ta a ni,” a ti bawk.
MNF president chuan kum 20 chhung an inkah hnuin kohhran, NGO leh pawl hrang hrang ngenna angin inremna entawntlak ber an nei ta tih a sawi a. He inremna hi thenkhatin sawi bawrhban tum thin mah se, a hlutzia an hre zel tih sawiin, “Kan hnam hi Pathianin min hruai zel ang a, rem a tih hunah zalenna sang ber kan neih hun hi a la herchhuahtir ngei ang,” tiin a sawi bawk.
Diamond Jubilee lawmna hun hi Dr. R. Lalthangliana, MLA, Sr.Vice President MNF & Chairman, Mizoram Independence Puan kum 60-na Diamond Jubilee Celebration Committee-in a kaihruai a. Jubilee lawmna inkhawm neih hmain MNF President Zoramthanga’n Hnam Runah Diamond Jubilee lungphun a hawng a ni.