Home Minister K. Sapdanga chuan Myanmar atanga Mizoram raltlante chu biometric enrollment neih mek a nih thu sawiin chhinchhiah chu 26,381 an awm thu House a hrilh.
Assembly Budget Session neih mekah Thawhtannia zawhna leh chhanna hunah Siaha bialtu MLA Dr. K. Beichhua zawhna chhangin home minister chuan kumin February 5 thleng khan Myanmar raltlan chhinchhiah chu 26,381 an awm thu leh hemi hun chhung vek hian chhinchhiah zawh loh 1,974 an awm thu a sawi.
Home minister chuan an unau Myanmar raltlante chu mangang, hlauthawng leh harsa taka rawn chhuk thla an nih thu sawiin, “Sorkar duhna hmunah pawh an awm thei bik lo a, anmahni duhna hmunah pawh an awm thei lo, a rem remah an awm darh a, an awmna hmun tur atana ruahmante nei thin bawk mah ila an awm tak tak thei thin lo. Ruahmantu tan pawh a tih tak tak theih loh a, raltlante tan pawh a tih tak tak theih loh,” tiin a sawi.
Raltlante an sumdawng deuh noh noh nia hriat a nih thu pawh sawiin home minister chuan, theihtawp a an chhui zel thu a sawi a, man tulte pawh an man a, an thil zawrh leh tawlh vel azirte pawha thubuai rip tak tak awrh mekte pawh an awm thu a sawi bawk
Zawh belhna chhangin K. Sapdanga chuan Champhaia raltlan Buk chu sorkar sak a ni lo tih a sawi a, YMA sak a nih thu leh sorkarin a sakna tur tanpuina erawh a pe tih a sawi.
Home minister chuan Mizoram kaltlanga Myanmar-a tuialhthei phurte atanga chhiah lak chu sorkarin a hriatpui loh thu sawiin Sangau Police Station tichangtlung turin hmalak mek zel a ni tih a sawi a. Heng bakah hian Bangladesh atanga Mizorama raltlante hi lut leh chhuak an awm reng avangin leh dan lova lut man an awm fo bawk avangin chhinchhiah hleihtheih an ni lo tih sawiin, Myanmar raltlante chu an duhna hmun a awm sorkarin a phalsak lo tih a sawi bawk.