- Dr. C. Lalrampana
Mizo inneihna leh rokhawmna dan pass tharah hmeichhe chan a chhia niin a lang a abikin Mizo hmeichhiate an lung a hnur deuh a ni mai thei, sawi leh sel a tam hle.
The Mizo Marriage and Property Inheritance (Amendment) Bill, 2026 Feb. 25/2026 Assembly-a pass tak chuan social media lamah sawi zui a hlawh nasa hle. He dan siamthat hian Mizo leh Mizo inkara inneihna a pawm bakah Mizo mipain hmeichhe (hnamdang) nupuia a neihna chiah Mizo inneihnaah a pawm a. Hetih lai hian Mizo hmeichhia leh hnamdang inneihna a pawm lo thung a. An fate pawhin tribal nihna an ‘claim’ thei tawh dawn lo bawk a ni.
Mizo hmeichhia hnamdang pasal nei chuan rokhawm chungchangah pawh chan tur an nei tawh dawn lo bawk a ni. Mipa hnamdang nei inkara piang fate erawhin Mizo dan angin ro an la khawm vek thei thung dawn a ni. Hetih lai hian he dan veka Mizo tih sawifiahnaah Mizo leh Mizo nu leh pa inkara piang tu pawh Mizovah a pawm a. Mizo hmeichhia hnamdang neite chu an Mizo-na (identity) a bo tih he danah hian a inziak lo thung.
Engpawhnise, hemi chungchangah hian ngaihdan a inang lo hlawm hle tih chu social media platform hrang hranga inhnialna atangin a chiang hle a. Tawngkam feikibara inkhawhtawn zuai zuaite pawh hmuh tur a awm. A bikin thalai nula/tlangval inepin an inkaptawn nasa hle a. Hnamdang nupui/pasal neih chungchangah an inmawhpuhtawn nasa hle.
Mizo mipui leh mipa tam zawk hian Mizo hmeichhia hnamdang pasal chungchangah an neihte azirin thliar hranna kan nei thin niin a lang. Phai Vaiho pasala nei leh Sap leh Sap rawngkai [foreigner] pasala neite kan en dan a danglam hle niin a hriat theih bawk. Sapho leh Sap rawngkaiho an nih avanga ngaimawh lem si lo, vaiho an neih avanga kan ngaimawhleh êm êm si hi thilmak tak leh awmze nei lo a ni. Kan thikthu chhiat dan a inang reng tur a ni.
Mizo hmeichhia aia mizo mipain hnamdang nupuia an neih tlemna chhan nia langte chu:
- Tunhma atangin mipa hnamdang nupuia neite chu khawtlangin kan en tleu thin avangin;
- Hmeichhia aiin mipain tawng dang an thiam tawk loh zawk avangjn;
- Hnamdang aiin Mizo hmeichhiain an pasalte an support that zawk angin;
- Puipun nikhua leh sakhaw rawngbawlnaah hnamdang an nih avangin hruai ve zel zahthlak an tih avangin;
- Ei leh in duh zawng leh mizia khawsak dan leh incheina, hnamziarang a inan loh avangin etc.
Hetihlai hian Mizo hmeichhiain hnamdang an neih chak zawkna chhan chu hnamdang mipate’n hmeichhia an ngaihven zawk a, hmeichhiain duh duhin a thunun thei zawk bawk. Ei leh bar zawn kawngah Nizo mipa aiin hnamdang an rintlak zawk tlangpui.
Mizo mipa ruihhlo bawiha tang leh, zelthel, hnathawk lova nitin ruih tum ringawt, mahni nupuite kuthlaka tuhduhdah ching lah an tam hle a, hmeichhehovin neih tlakah an ngai lo. Sipai intlar changa target chin pawh tlan chhuak thei lo khawpa ruihhlo chihhrang hrangin a bawh buai lah an pung tual tual bawk nen. Hmeichhe tan chuan he dan thar hi hleih neihnaah a ngaih theih ve tlat.
A tawp berah chuan engangpawhin dan tha nei mah ila Abrahama policy anga fa/chithlah lamah tan kan lak duh chuan si loh chuan Mizote hi kan tlem tial tial ang a, kan la ral thum ngei dawn zawk niin a lang. Synod-in pianpun, fa neih tam policy a kalpui atang khan chithlah pun kan peih tak tak lohzia chu a lang chiang hle. Zantin nupuite pawl chu duh theuh siin fa neih tam erawh kan hlauleh êm êm vek si niin a lang. Onana’n a u chi thlahsak duh si lova pãwl nawmna ringawt duha a u nupui a pawl zawha a chi leiah a titla daih thin anga khawsa mek nupa tuak tam tak zantin khumlaizawla tãl thinte hian Abrahama policy [pianpun policy] hi a takin nunpui se, rei vak lovah Mizote hian kan ram hi kan luah khat ve thuai ang a, inngurtawn rengin kan awm lo mai ang.