Aizawl: I&PR Minister B. Lalchhanzova chuan Thenzawl Lo-Tha-Zawl Playground-a artificial football turf phah tur lungphum a phum.
Lungphum phumna puala inkhawmah Minister B Lalchhanzova chuan, tuna football field an siam tur chu Thenzawl leh a chhehvel khaw mipuiin ral thlir lo va, neitu thinlung puin vil se a duh tih a sawi a. Tha taka hnathawh a nih theihna thawktute lo enkawlte thleng pawhin mawh an phut a ni tih hria se a duh thu a sawi.
Minister chuan, “He thil hi awlsam tea neih theuh a lo lo va, a hlutzia kan hriat a ngai a,” tia sawiin, tuna artificail football turf siam dan tur lehkha an sem chu lo dah tha a, siam zawh a nih hunah a nih tur ang a ni em tihte thlenga lo vil zui turin mipui a chah bawk.
Thenzawl Lo-Tha-Zawl playground-a artificial turf phah tur hi sorkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) Scheme atangin June ni 11, 2025 khan Rs vbc 11.856 sanction dawn a ni a. Hnathawktu tur contractor zawnna atan open tender chhuah a nih hnuah he hnathawk tur hian M/s Décor India, Guwahati, Assam te thlan niin, work order pawh ni February 24, 2026 khan pek fel an ni a, work order amount chu Rs vbc 10.33 a ni.