Mizoram Chief Secretary Khilli Ram Meena chuan mipui mamawh khawp eirawngbawlna gas leh tuialhthei chhek khawl (stock) tam tawk a awm thu leh ngaihthat loh emaw, chiaina chhan tur emaw a awm loh thu thuchhuah a siam.
Chief secretary chuan sorkar laipuiin Ministry of Petroleum & Natural Gas (MoPNG) kaltlangin ram chhung hmun hrang hranga eirawngbawlna gas leh tuialhthei lak luh leh sem chhuah dan chu uluk takin a thlithlai reng tih a tar lang a. March 27, 2026 khan prime minister hova state hrang hranga chief minister leh chief secretary-te thutkhawmah mipuite mamawh lak luh leh sem chhuah dan uluk taka en zui reng a pawimawhzia uar taka sawi a ni a. Eirawngbawlna gas leh tuialhthei chhek khawl tam tawk tak a awm a ni tih leh ngaihthat loh emaw, chiaina chhan tur emaw a awm lo tih mipuite hriattir an nih thu a tar lang.
March 28, 2026 khan chief secretary hovin Food, Civil Supplies & Consumer Affairs Department (FCS&CA) hotu te, district tin bawrhsap-te leh oil marketing company (OMC)-te thutkhawmah mipui mamawh phuhrukna tur tuialhthei leh eirawngbawlna gas chhek khawl tam tawk tak a awm tih an sawi a, mipui tan thlaphanna tur a awm loh thu a sawi.
Chief secretary chuan tuialhthei leh eirawngbawlna gas chhek ruk, man to zawka ‘black’ hralh leh chheprelh a nih lohna turin district tin bawrhsapte chahin dan bawhchhia an awm a nih chuan a bawhchhetute lakah hremna khauh tak lekkawh turin a chah bawk.