Aizawl: Mizoram Rural Bank (MRB) chuan Corporate Social Responsibility (CSR) kaltlangin Thawhlehni khan thilpek hmun li-ah an hlan.
Thilpek inhlanna pui ber hi MRB Head Office Board Room-ah neih niin, V. Lalrinmawia, Secretary CSR Committee-in a kaihruai a. MRB chuan bank profit atanga chhuta CSR kaltlanga pawl, khawtlang leh sorkar office hrang hrang tana an luanchhuah tawh thin thu leh kumin pawh hian cheng nuai za chuang hmanral anih thu a sawi.
He hunah hian Computer set nga chu MRB Chairman Sheryl L Vanchhong-in Mizoram Journalists’ Association (MJA) hnenah hlanin MJA aiawhin President C. Lalrambuatsaiha’n a dawng.
Hemi rual hian Computer Set 24 leh A3 printer pakhat chu Industrial Training Institute, LESDE Department hnenah MRB chairman-in hlanin LESDE Department aiawhin PC Lalhriatpuia, Principal ITI-in a dawng a. Tun hnai deuh atang khan ITI hi sorkar laipui lam atanga tihchangtlun chhoh mek niin, tunah hian skill laboratory tha tak buatsaih a ni a. He laboratory hi mechanical engneering, electrical & electronics engineering kaihhnawih simulation atana hman tur a ni.
Thawhlehni vek khan Higher & Technical Institute of Mizoram (HATIM), Pukpui, Lunglei hnenah Smart Interactive Board (65 inch) hlan a ni bawk a. Dr. R. Lalnunthara, Principal, HATIM chuan thilpek hi dawngin T. Hmingthantluanga Tonson, Regional Manager, Network 2-in a hlan.
SP Office, Champhaia hman turin computer set thum leh printer pathum chu Alan Hmangaihsanga, MPS, DSP (Hqrs.), Champhai DEF hnenah C. Lalsanglura, Chief Manager, Champhai Branch-in a hlan bawk.
CSR kaltlanga MRB luan chhuahna hi Rs. 19,94,220 man hu a ni.